Trend agentliyinin məlumatına əsasən, Olya limanını Bakı ilə birləşdirən Xəzər bərə xəttinin açılışı iyulun 1-nə təyin olunub. "Xəzər" xəttində işləyəcək əsas gəmi "Bəstəkar Qara Qarayev" bərəsidir. Bu bərə ayda iki dəfə, ayın 1 və 15-də Xəzəri keçəcək. Xətdəki əsas limanlar Olya və Bakı, əlavə isə - Ənzəli (İran) və Türkmənbaşıdır (Türkmənistan).
Xəzər Dəniz Gəmiçiliyi İdarəsindən Trend ə verilən məlumata əsasən, bu gəmi 60 "KamAZ" markalı maşın və ya qoşqu ilə birlikdə 40 ağır yük maşını daşıya bilər. Bu ilin qışında idarə artıq marşrut üzrə pilot reysi həyata keçirib. Reysin açılışının ləngiməsi hava şəraitilə əlaqədar Azərbaycan yollarında şimal istiqamətində hərəkətin çətinliyi ilə izah olunurdu.
Reysin müddəti iki günə bərabərdir. Bütün gömrük və sərhəd prosedurları Bakı beynəlxalq dəniz limanında gəmi gəldikdə keçiriləcək.
