Azərbaycan, Bakı, 14 dekabr /Trend, müxbir A.Axundov/
"SOCAR & TURCAS Rafineri A.S." Əliağa vilayətində Türkiyənin iri Petkim neft-kimya kompleksinin yaxınlığında yerləşəcək yeni neft emalı zavodu üçün layihələrin idarə olunması üzrə məsləhətçi seçilən Amerikanın "Fluor Corporation" şirkəti ilə müqavilə imzalayıb. Bu barədə Amerika şirkətinin çərşənbə axşamı yaydığı məlumatda deyilir.
Məlumata görə, "Fluor Corporation" Türkiyədə yeni NEZ-in tikintisi çərçivəsində injinirinqin seçimi və idarə olunması, təchizat və podratçı seçimi üzrə xidmətlər göstərəcək. Şirkət artıq bu layihə çərçivəsində işlərə başlayıb. Müqavilənin dəyəri açıqlanmır.
İyunun əvvəlində "SOCAR/TURCAS Rafineri AS" Türkiyənin enerji bazarının tənzimləyicisindən neft emalı zavodunun tikintisinə lisenziya alıb.
Yeni zavod Türkiyənin Əliağa vilayətində Petkim neft-kimya kompleksinin meydanında (ARDNŞ "Turcas"la birgə bu müəssisədə 51 faizlik iştirak payına malikdir) tikiləcək. Türkiyə sənayesində mühüm rol oynayacaq bu müəssisənin tikintisində 7-10 min adam iştirak edəcək. Onun istismara verilməsinsdən sonar orada min nəfər çalışacaq.
Yeni müəssisənin gücü sutkada 214 min barel təşkil edəcək. Nafta və mazut hidrokrekinqdən sonra kimyəvi məhsulların istehsalı üçün "Petkim" kompleksinə göndəriləcək.
NEZ-ə naftanın hidrotəmizlənməsi üzrə atmosfer-vakuum trubçatkaların elektroduzsuzlaşdırma qurğusu, ləng kokslaşdırma (gücü sutkada 40 min barel), hidrokrekinq (sutkada 66 min barel), kerosin və dizel yanacağının hidrotəmizlənməsi qurğusu, LPG təmizləmə, katalitik reforminq (gücü sutkada 28 min barel), qazla təchiz olunmuş qurğu və digər avadanlıqlar daxildir.
Yeni zavodun gücü ildə 10 milyon ton olacaq və bunun 4 milyon tonu "Petkim"in xammala olan tələbatının ödənilməsinə yönəldiləcək. Yerdə qalan hissə, o cümlədən dizel yanacağı, aviasiya kerosini və digər enerjidaşıyıcılar Türkiyə və Avropa bazarlarında satışa çıxarılacaq.
2008-ci ildə "SOCAR/Turcas Petrol/Injaz Projects" şirkətlər alyansı Türkiyənin "Petkim" neft-kimya holdinqində 51 faizlik səhm paketinin alınması üçün tenderin qalibi olub. Buna görə də alyansa 2,04 milyard dollar təklif edilib. Hazırda Türkiyə zəruri kimya məhsullarının 70-75 faizini idxal edir. "SOCAR/Turcas/Injaz"ın Petkimin inkişafına yatıracağı sərmayələr məhsul idxalını 30 faizədək azaltmağa imkan verir.
"Petkim Petrokimya Holding" plastik qablaşdırmalar, parçalar, PVC, yuyucu vasitələr istehsal edir və Türkiyədə belə məhsulların yeganə istehsalçısıdır. Şirkət məhsullarının ¼-ni ixrac edir.
Fluor Corporation dünyada ən aparıcı injinirinq şirkətlərindən biridir. O, öz müştərilərinə layihələndirmə, MTS, sənaye obyektlərində tikinti və texniki xidmətlər göstərir.
