Türkiyənin şərqində İrana məxsus sərnişin avtobus dərəyə aşıb. Hadisə nəticəsində 25 iranlı sərnişin yaralanıb. Bu barədə İran Televiziyası (İRİB) məlumat yayıb.
İrana məxsus sərnişin avtobusu çərşənbə günü İran-Türkiyə sərhəd keçid məntəqəsindən Türkiyə ərazisinə daxil olub. Avtobus Türkiyənin Siirt əyalətinin Balkan şəhər magistral yolunun 10-cu kilometrliyində yoldan çıxaraq dərəyə aşıb. Hadisəyə səbəb yolun sürüşkən olması bildirilir.
Hadisə nəticəsində yaralanmış şəxslər Siirt əyalətindəki xəstəxanaya çatdırılıb. Yaralananların ümumi vəziyyətinin qənaətbəxş olduğu bildirilir.
2008-ci ilin sentyabr ayında da İrana məxsus sərnişin avtobusu Türkiyənin Doğubayəzid (Doğubeyazıt) şəhər yaxınlığında dərəyə aşmışdı. Hadisə nəticəsində 16 nəfər ölmüş və 24 nəfər isə yaralanmışdı.