Londonda səfərdə olan Türkiyənin xarici işlər naziri Əhməd Davudoğlu jurnalistlərə bildirib ki, Ermənistan Konstitusiya Məhkəməsi tərəfindən Ermənistan-Türkiyə protokollorına edilən dəyişiklər sənədlərin ruhuna ziddir. Məlumatı Anadolu informasiya agentliyi yayıb.
"Ermənistan-Türkiyə əlaqələrinin normallaşması haqqında protokolların Konstitutsiya Məhkəməsinə təqdim edilməsi Ermənistanın şəxsi işidir və Türkiyə buna hörmətlə yanaşır, - Davudoğlu deyib. - Lakin Konstitusiya Məhkəməsi tərəfindən dəyişikliklərin edilməsi protokolların ruhuna ziddir".
Protokollar hər iki ölkənin parlamentində ratifikasiya edildikdən sonra qüvvəyə minəcək.
Ermənistanlı həmkarı Edvard Nalbandyanla Britaniyanın paytaxtında görüşən Davudoğlu bu məsələni müzakirə edib və edilən dəyişiklərlə bağlı Ankaranın mövqeyini ifadə edib.
Ermənistanın Konstitusiya Məhkəməsi tərəfindən yanvarın 12-də edilən dəyişikliklərə əsasən, imzalanan protokolların ratifikasiyası mümkündür. Lakin məhkəmə Osmanlı İmperiyasında 1915-ci il hadisələrinin araşdırılması üzrə birgə komissiyanın yaradılmasını yolverilməz adlandırıb.
Davudoğlunun sözlərinə görə, Ermənistanda Ankaranın məqsəd və niyyətini çox yaxşı bilirlər.
"Ermənistanla əlaqələrin normallaşması prosesinin bizim baxışımızla üst-üstə düşməsi Türkiyə üçün mühüm əhəmiyyət kəsb edir. Türkiyə atılan addımların doğru olduğuna əmindir və qarşı tərəfin tənqid və maneələrinə böyük əhəmiyyət vermir", - Davudoğlu deyib.