"Sığortalı Gənclik" layihəsi Kooperasiya Universitetində (FOTO)

Azərbaycan, Bakı, 28 aprel /Trend/

Aprelin 27-də "Sığortalı Gənclik" layihəsi çərçivəsində Kooperasiya Universitetinin tələbələri ilə görüş keçirilib. Trend-in məlumatına görə, görüşdə universitetin 40 tələbəsi iştirak edib. Azərbaycan Sığortaçılar Assosiasiyasının nümayəndələri tələbələrə layihənin məqsədi və sığorta ilə bağlı maariflənmənin əhəmiyyətindən danışıblar.

Tədbir iştirakçılarına, həmçinin, sığortanın tarixi, dünya sığorta bazarında gedən proseslər, Azərbaycanın sığorta sektorundakı mövcud vəziyyətlə bağlı geniş məlumat verilib, sığortanın mahiyyəti və onun faydaları barədə danışılıb. Görüşdə tələbələrin sığorta ilə bağlı sualları cavablandırılıb, onlarla fikir mübadiləsi aparılıb. İştirakçılar sığorta sahəsinə aid maraqlı fikirlər səsləndiriblər.

Xatırladaq ki, "Sığortalı gənclik" layihəsi Maliyyə Nazirliyinin, eləcə də Gənclər və İdman Nazirliyinin dəstəyi, Azərbaycan Sığortaçılar Assosiasiyasının, Tələbə Gənclər Təşkilatları İttifaqı, Gənclər Təşkilatları Milli Şurası və "Vətəndaş cəmiyyətində debat" İctimai Birliyinin təşkilatçılığı və "Buta Sığorta"-nın tərəfdaşlığı ilə həyata keçirilir. Layihənin məqsədi gənclər arasında sığorta sahəsinin təbliği və təşviqi, gənclərin işçi kimi bu sahəyə cəlb olunması, onlarda sığorta mədəniyyətinin formalaşdırılmasıdır.