Azərbaycan, Bakı, 3 aprel / Trend, müxbir E.Tariverdiyeva /
ABŞ İsrailin Azərbaycanın bəzi hərbi aerodromlarından istifadə etmək hüququ əldə etməsinə dair məlumata malik deyil. Trend-in məlumatına görə, bunu ABŞ Dövlət Departamentinin rəsmi nümayəndəsi Viktoriya Nulənd brifinqdə bəyan edib.
"Mən bunu təsdiqləyəcək heç bir informasiyaya malik deyiləm", - DD-nin saytı Nuləndin dediklərindən sitat gətirir.
Daha əvvəl Azərbaycan Müdafiə Nazirliyi bir sıra xarici KİV-in Azərbaycan ərazisindəki hansısa aerodromların istifadə olunması üçün xarici dövlətə verilməsinə dair məlumatı təkzib edib.
İsrailin bir sıra KİV-i "Foreign Policy" jurnalına istinadən Azərbaycanın İranla sərhəd ərazisində yerləşən aeroportları guya İsrailə icarəyə verdiyi barədə məlumatlar yayıblar.
Prezident Administrasiyasının İctimai-siyasi məsələlər şöbəsinin müdiri Əli Həsənov isə bildirib ki, Azərbaycan dövlətinin ərazisindən İrana qarşı heç vaxt istifadə olunmayıb, olunmur və olunmayacaq.