Bakı. Trend:
Nizami Gəncəvi Beynəlxalq Mərkəzinin (NGBM) nümayəndə heyəti Ukraynadakı qaçqın böhranının həllində Moldovanı dəstəkləmək üçün Kişinyovda səfərdədir.
Trend-in məlumatına görə, səfər martın 23-dən 25-dək davam edəcək.
NGBM nümayəndə heyətinin tərkibində Moldovaya səfər edən şəxslər: Zlatko Laqumdziya, Bosniya və Herseqovinanın Baş naziri (2001-2002), 1993-1996, 2012-2015 Baş nazirinin müavini, Petre Roman, Rumıniyanın Baş naziri (1989) -1991), parlamentin spikeri 1996-1999, Eka Tkeşelaşvili, Gürcüstan Baş nazirinin müavini (2010-2012), 2008-ci ilin xarici işlər naziri; Rövşən Muradov, Nizami Gəncəvi Beynəlxalq Mərkəzinin baş katibi.
Nümayəndə heyətinin üzvləri Moldova Dövlət Universitetinin FRİSPA məhəlləsində (N. Testemisana küçəsi, 6) qaçqınların yerləşdirilməsi Mərkəzinin mənzil-qərargahında 24 mart 2022-ci il saat 12:30-da mətbuat brifinqi keçirəcəklər.
3 gün ərzində beynəlxalq nümayəndə heyəti Kişinyovda ukraynalı qaçqınlar üçün bir neçə sığınacaq, habelə qida və gigiyena məhsullarının paylanması üzrə anbarları ziyarət edəcək. Səfər həmçinin Moldova Respublikasının Baş naziri ilə, eləcə də sosial müdafiə naziri, parlamentin sədri, xarici işlər naziri ilə işgüzar görüşləri nəzərdə tutur.
Xatırladaq ki, Nizami Gəncəvi Beynəlxalq Mərkəzi (NGBM) ən yüksək səviyyədə dialoq və konstruktiv müzakirələr yolu ilə dünyada anlaşma, sülh, firavanlıq, qlobal problemlər və çağırışlar üzrə məsləhətləşməni təşviq edən, Azərbaycanın paytaxtı Bakı şəhərində yerləşən beynəlxalq təşkilatdır. Təşkilatın nümayəndələri Bakıda keçirilən illik tədbirlə (Qlobal Forum) yanaşı, Çin, ABŞ, Yunanıstan, İtaliya, Belçika, Misir, Latviya, Bosniya və Herseqovina, Bolqarıstan, Ukrayna və bir çox başqa ölkələrdə müntəzəm regional səfərlər həyata keçirirlər.