Azərbaycan, Bakı /müxbir Trend İ.Əlizadə/Milli Məclisin fevralın 27-də keçirilən iclasında "Atçılıq haqqında" qanun ikinci və üçüncü oxunuşda qəbul olunub. Parlamentin Aqrar siyasət daimi komissiyasının sədri Eldar İbrahimov atçılığın təşkilinin və idarə edilməsinin iqtisadi və hüquqi əsaslarını müəyyən edən qanunun Milli Məclisdə ilk oxunuşundan sonra tamamilə yenidən işləndiyini bildirib. Bildirib ki, sənəddə çoxlu dəyişikliklər olunub, 9 yeni maddə, 2 yeni fəsil əlavə olunub.
Onun fikrincə, atçılıqda damazlıq işinin yaxşılaşdırılması, cins Azərbaycan atlarının və beynəlxalq at cinslərinin genofondunun qorunub saxlanması, qiymətli irsi əlamətlərə malik atların yetişdirilməsi üçün sənəd çox mükəmməl hüquqi zəmin yarada biləcək.
Yeni qanunun qəbulundan sonra Kənd Təsərrüfatı Nazirliyi Azərbaycanın damazlıq atlarını Dövlət Damazlıq Kitabında xüsusi qeydiyyata alaraq pasport verəcək və belə atların satışına qadağa qoyulacaq.
Bundan başqa yeni qanun atçılığın inkişaf etdirilməsinə, Azərbaycanın cins atları olan Dilboz və Qarabağ atlarının sayının artırılmasına imkan verəcək.
Müzakirələrdən sonra qanun layihəsi ikinci və üçüncü oxunuşda qəbul olunub.