Azərbaycan, Bakı /müx. Trend A. Qasımova / Türkiyədəki parlament seçkilərində hakim partiya olan Ədalət və İnkişaf Partiyasının qalib gəlməsi ölkənin Avropa Birliyinə daxil olmasını sürətləndirməyəcək. "Rəcəp Tayyip Ərdoğanın və ya digər bir şəxsin partiyasının parlament seçkilərində qalibiyyəti Türkiyənin AB-yə daxil olması şanslarına heç cür təsir etməyəcək", Rusiyanın "Kommersant" qəzetinin beynəlxalq siyasət şöbəsinin rəhbəri, politoloq Azər Mürsəliyev belə hesab edir.
Səslərin 85%-nin hesablamalarının nəticələrinə görə, bazar günü Türkiyədə keçirilən növbədənkənar parlament seçkilərində baş nazir Ərdoğanın başçılıq etdiyi Ədalət və İnkişaf Partiyası parlamentdəki 550 yerin 331-ni qazanıb. Türkiyənin baş naziri bəyan edib ki, onun hökuməti islahatlar və ölkənin Avropa Birliyinə qoşulması istiqamətində kursu davam etdirəcək. "Biz öz məqsədimiz, Avropa Birliyinə inteqrasiyaya doğru gedəcəyik" - deyə Türkiyənin baş naziri partiya qərargahında partiyadaşlarına və seçicilərinə bəyan edib.
Bazar ertəsi telefonla Moskvadan verdiyi məlumatda Mürsəliyev bildirib ki, Türkiyənin Avropa Birliyinə qəbul olunması Türkiyənin buna hazır, yaxud hazır olmamasından deyil, Avropa Birliyinin öz sıralarına 80 milyonluq müsəlman ölkəsini qəbul etmək istəməməsindən və ya buna hazır olmamasından asılıdır.
"Əgər Türkiyə zəif olsaydı, əhalisi az olsaydı, iqtisadiyyatının səviyyəsi Bolqarıstan və ya Yunanıstanın səviyyəsində olsaydı, bu halda onu qəbul edərdilər" - deyə o bildirib. "Avropada Fransa, İtaliya, İspaniya, Portuqaliya kimi dövlətlər böyük rola malikdirlər və Türkiyənin AB-yə daxil olması onlar üçün böyük problemlər deməkdir" - deyə o əlavə edib. Onun sözlərinə görə, bu ölkələr üçün Türkiyənin AB-yə qəbulu ilk növbədə kəskin rəqabət və onların aparıcı rollarının sıxışdırılması deməkdir. "Bu səbəbdən də bu ölkələrin heç biri Türkiyənin Avropa Birliyinə qəbuluna heç vaxt razı olmayacaq" - deyə politoloq vurğulayıb.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
