Quba məzarlığında dağılmış quyudakı sümüklər yenidən öz yerlərinə qoyulacaq
Azərbaycan, Bakı, 28 mart /Trend, müxbir İ.İsabalayeva/
Ermənilərin 1918-ci ildə azərbaycanlılara qarşı törətdiyi soyqırımın sübutu olan Quba məzarlığındakı sümüklər hermetik şüşə altına salınarkən 2007-2008-ci illərdə baxımsızlıq üzündən dağlmış içi insan sümükləri ilə dolu olan quyudakı sümüklər də yenidən öz yerlərinə qoyulacaq. Bunu cümə axşamı Trend-ə Quba soyqırımı ekspedisiyasının rəhbəri, Azərbaycan Milli Elmlər Akademiyasının Arxeologiya və Etnoqrafiya İnstitutunun aparıcı elmi işçisi Qəhrəman Ağayev bildirib.
O deyib ki, Azərbaycan tarixi üçün çox əhəmiyyətli olan Quba məzarlığı 2007-ci il aprelin 1-də aşkarlanıb. Sahəsi 514 kvadratmetr olan məzarlığın tədqiqatlar aparılmış 494 kvadratmetr ərazisində içi insan sümükləri ilə dolu olan 2 quyu və 2 arx aşkarlansa da, həmin quyulardan biri baxımsızlıq üzündən 2007-2008-ci ildə dağılıb. Ancaq həmin sümüklər dağılmış quyunun icindən çıxarılaraq məzarlıqda qorunub saxlanılır, quyunun içi isə təmizlənib.
Ekspedisiya rəhbərinin sözlərinə görə, aprel ayından məzarlığındakı sümüklərin qorunması üçün onların hermetik şüşə altına salınması işlərinə başlamaq nəzərdə tutulur. Bu işlər təxminən 1 ay davam edəcək. Məzarlıqdakı sümüklərin hermetik şüşə altına salınması işi ümimilikdə təxminən 2 aya yekunlaşacaq.
Ağayev qeyd edib ki, sümüklər hermetik şüşə altına salınarkən vaxtilə onun icində olmuş sümüklər də yenidən onun icinə qoyulacaq və həmin yer hermetik şüşə altına salınacaq.
