...

Azərbaycanda meşələrin icarəsinə maraq artıb

Cəmiyyət Materials 1 Dekabr 2017 07:48 (UTC +04:00)
Meşə fondu torpaqlarının icarəyə verilmə müddətinin artırılmasından sonra sahibkarların meşələri icarəyə götürməsinə olan marağı xeyli artıb.
Azərbaycanda meşələrin icarəsinə maraq artıb

Bakı. İlhamə İsabalayeva - Trend:

Meşə fondu torpaqlarının icarəyə verilmə müddətinin artırılmasından sonra sahibkarların meşələri icarəyə götürməsinə olan marağı xeyli artıb.

Bunu Trend-ə Ekologiya və Təbii Sərvətlər Nazirliyinin (ETSN) Meşələrin İnkişafı Departamentinin sektor müdiri Sadiq Salmanov deyib.

Onun sözlərinə görə, meşələrin icarəsinə daha çox sahibkarı çəlb etmək üçün bu ilin fevral ayında Meşə Məcəlləsinə dəyişiklik edilib. Dəyişiklikdən sonra meşə fondu torpaqları sahibkarlara 10 ilə qədər deyil, 49 ilə qədər olan müddət üçün icarəyə verilir.

S.Salmanov qeyd edib ki, Meşə Məcəlləsinə bu dəyişiklik edilənə qədər sahibkarlar meşə fondu torpaqlarını icarəyə götürməkdə maraqlı deyildilər:

"Çünki onlar deyirdilər ki, bu torpaq mənə 10 ilə verilir. Onun 5 ilində bağ salıb ağacları yetişdirirəm, 5 ildən sonra da məhsul alıram. 10 ildən sonra məlum deyil ki, mənimlə təkrar müqavilə bağlanılacaq, ya yox. Bu dəyişiklik isə sahbkarlarda maraq yaratdı. İcarə müddətinin artırılması həm sahibkarın sosial vəziyyətini yaxşılaşdırır, həm də ölkənin ərzaq təhlükəsizliyi təmin edilir".

S.Salmanov deyib ki, indiyədək həm dağ, həm də aran rayonlarındakı meşə fondu torpaqları daxil olmaqla, 1500 hektara yaxın meşə fondu torpaqları sahibkarlara icarəyə verilib. Həmin torpaqların 600-ə yaxın hektarı qısa müddətə icarəyə götürülüb.

S.Salmanov əlavə edib ki, meşə zonaları daha çox dağ zonalarındadır: "Buna görə də sahibkarlar əsasən ölkənin dağ rayonlarındakı meşə torpaqlarını icarayə götürürlər".

Məqalədə:
Xəbər lenti

Xəbər lenti