Bakı. Ənvər Məmmədov, Maksim Tsurkov - Trend:
Milli Gimnastika Arenasında yaradılan şərait çox gözəldir.
Bunu Trend-ə idman gimnastikası üzrə Avstraliyanın kişilərdən ibarət milli komandasının məşqçisi Vladimir Vatkin deyib.
Məşqçi komanda ilə Bakıya ilk dəfə gəldiyini deyib: “Biz hələ hər şeyi tam nəzərdən keçirməmişik. Amma deyə bilərəm ki, zalda yaradılan şərait çox gözəldir. Hələlik təəssüratlar çox olmasa da, müsbətdir”.
Onun sözlərinə görə, avstraliyalı idmançılar qarşısındakı əsas məqsəd finala çıxmaqdır: “Biz buraya ən yaxşı idmançılarımızı gətirmişik. Bizim idmançılar Dünya kuboklarında medallar qazanıblar. Məsələn, Kris Remkes dayaqla tullanmada gümüş mükafat qazanıb. Amma burada rəqabət çox güclüdür və asan qələbə olmayacaq. Ona görə qarşımıza finala çıxmaq məqsədi qoymuşuq”.
Öz növbəsində Avstraliyanın qadınlardan ibarət milli komandasının məşqçisi Mixail Barabaş Bakıya ən yaxşı gimnastların gətirildiyini deyib: “Dayaqla tullanmada Dünya kubokunun lideri Emili Littl gəlib. Ümid edirik ki, o, finala çıxacaq. Onun medallar uğrunda mübarizə aparacağına ümidvarıq. Komandanın digər üzvləri gənc və perspektivlidir. Onların da hədəfi finala çıxmaqdır”.
Məşqçi bildirib ki, idmançıların zal barədə təəssüratları yaxşıdır: “Ümumiyyətlə, Bakıda mühit çox yaxşıdır, sakinlər qonaqpərvərdir. Hər kəs kömək etməyə hazırdır. İqlimə uyğunlaşmaq üçün bir neçə gün də lazım olacaq. İdmançılarımız birinci dəfə deyil ki, Avstraliyadan kənara çıxırlar və bu sahədə təcrübəlidirlər”.
Qeyd edək ki, 16-19 mart tarixlərində Bakıda Milli Gimnastika Arenasında kişi və qadın idman gimnastikası üzrə FIG Dünya Kuboku mərhələsi keçiriləcək. Artıq ikinci ildir ki, paytaxtımızın ev sahibliyi etdiyi bu turnirdə 23 ölkədən ümumilikdə 85 kişi, 35 qadın idmançının çıxışı gözlənilir.
Turnirin ilk 2 günü təsnifat mərhələləri, son 2 günü isə ayrı-ayrı alətlər üzrə finallar baş tutacaq. Yeni Olimpiya dövrünün 2017-ci ildən qüvvəyə minən yeni qaydaları əsasında kişi gimnastlar 6, qadın gimnastlar isə 4 dəst medal uğrunda mübarizə aparacaqlar.
Məşhur kişi idmançılar arasında Olimpiya çempionları Elefterios Petrunias (Yunanıstan), Kristian Berki (Macarıstan), Olimpiya Oyunlarının gümüş mükafatçısı Filip Ude (Xorvatiya) və Avropa çempionu Aleksandr Şatilov (İsrail) peşəkar çıxışları ilə hər kəsi heyran edəcəklər.
Qadın idmançılar arasında isə 3 qat Olimpiya çempionu Katalina Ponor (Rumıniya) və Olimpiya Oyunlarının qızıl medalçısı Oksana Çusovitina (hazırda Özbəkistanı təmsil edir) kimi məşhur gimnastlar yer alacaqlar.
Ölkəmizi kişi idman gimnastikası üzrə yarışlarda Murad Ağarzayev, Bense Talas, qadın idman gimnastlarının turnirində isə Yuliya İnşina, Marina Nekrasova, Mariya Smirnova və Yekaterina Tişkova təmsil edəcəklər.
