Azərbaycanlı mütəxəssislər Daşkənddə Quraq rayonlarda kənd təsərrüfatı araşdırmaları üzrə beynəlxalq mərkəz (ICARDA - International Center for Agricultural Research in the Dry Areas), International Water Management Institute və International Center for Biosaline Agriculture (ICBA)) tərəfindən təşkil olunmuş treninqlərdə iştirak edib.
Kənd Təsərrüfatı Nazirliyinin elmi-aqrar mərkəzindən Trend ə verilən məlumata görə, İCARDA və Azərbaycan arasında əməkdaşlıq proqramı çərçivəsində treninqlərdə mərkəzin beynəlxalq əlaqələr şöbəsinin rəhbəri Yaqub Quliyev, Erroziya və suvarma ETİ-nin texniki- konstruktor bürosunun başçısı Seymur Səfərli, institutun mütəxəssisi Fuad Səlimov və torpaqşünaslıq institutunun alimi Mustafa Mustafayev iştirak edib.
Treninq "Şoran torpaqların bioloji üsullarla yaxşılaşdırılması" mövzusuna həsr olunub. Tədbir mayın 22-də başa çatıb.
Azərbaycandan başqa, treninqlərə Ermənistan (1 nəfər), Gürcüstan (2 nəfər) və Orta Asiya ölkələrindən (4 nəfər) mütəxəssislər də dəvət olunub.
"Treninqdə şoran torpaqların yaxşılaşdırılması üzrə ayrıca proqramın gerçəkləşdirilməsi ilə bağlı versiyalar irəli sürülüb", -deyə nazirlikdən bildirilib.
