Azərbaycan, Bakı / Trend , müxbir İ.Xəlilova / Azərbaycan və İranın nəqliyyat idarələri İran İslam Respublikası ərazisindən keçməklə Bakı-Naxçıvan-Bakı daimi avtobus marşrutunun açılması barədə razılığa gəliblər. Bu barədə məlumatı Azərbaycan Nəqliyyat Nazirliyinin iqtisadiyyat və nəqliyyat siyasəti üzrə şöbə müdiri Sədrəddin Məmmədov verib.
Dövlətlərarası Memorandum avqustun 21-də Bakıda İran prezidenti Mahmud Əhmədinejadın səfəri çərçivəsində imzalanıb.
"Biz İranın nəqliyyat işçiləri ilə avqustun axırına qədər İran ərazisində hərəkət marşrutunun müəyyənləşdirilməsi barədə razılıq əldə etdik" - deyə Məmmədov bildirib.
Azərbaycanda iki yerdə avtobus dayanacağı müəyyən edilib - Astara və Biləsuvar. Uyğun olaraq İran tərəfi də marşrutun iki istiqamətini göstərməlidir.
Bundan əlavə, hər iki tərəfdən həftə ərzində eyni sayda avtobus çıxmalıdır.
