Bakı. Trend:
ABŞ-ın İmmiqrasiya və Gömrük Mühafizəsi Xidməti (ICE) son beş gün ərzində küçələrdə və avtomobillərdə aparılan əməliyyatlar da daxil olmaqla 10 mindən çox şəxsi saxlayıb. Bu barədə The New York Times rəsmi şəxslərlə müsahibələrə və redaksiyanın əldə etdiyi sənədlərə istinadən məlumat yayıb.
Qəzetin həmsöhbətlərinin sözlərinə görə, Ağ Ev saxlanılanların sayının artırılmasını tələb edib. ICE əməkdaşlarına bildirilib ki, gündəlik 2 min həbs hüquq-mühafizə fəaliyyətində “yeni standart” olmalıdır.
Mənbələrin bildirdiyinə görə, hakimiyyət ötən ildən fərqli olaraq əməliyyatları əvvəlcədən elan etmədən keçirmək qərarına gəlib. NYT-nin qənaətincə, ABŞ Prezidenti Donald Trump administrasiyası mühafizəkar tərəfdarlarının dəstəyini qorumaq üçün kütləvi deportasiya siyasətini davam etdirməyi planlaşdırır.
Məlumata əsasən, ICE rəhbərliyi mümkün qədər çox əməkdaş üçün həftədə yeddi günlük iş rejimi tətbiq edib. Əməkdaşların 80 faizinin birbaşa saxlanılma əməliyyatlarına cəlb olunması tapşırılıb.
Bu ilin əvvəlində ABŞ-da miqrasiya xidmətinin əməkdaşlarının iki ölkə vətəndaşını güllələməsindən sonra etiraz aksiyaları keçirilmişdi.
Yanvarın 7-də Minneapolis şəhərində qeyri-qanuni miqrantların axtarışı əməliyyatı zamanı ICE əməkdaşları yolun hərəkət hissəsində avtomobilini saxlayan qadından nəqliyyat vasitəsindən düşməyi tələb ediblər. Avtomobil irəliləməyə başlayanda əməkdaşlardan biri sürücüyə atəş açıb. Qadın aldığı yaralardan dünyasını dəyişib.
Yanvarın 24-də isə sərhəd xidmətinin əməkdaşı Minneapolisdə bir kişini güllələyib. ABŞ Daxili Təhlükəsizlik Nazirliyi bildirib ki, federal agentlər onun əlindəki silahı almağa çalışarkən həmin şəxs müqavimət göstərib.
