Azərbaycan, Bakı, 02 oktyabr / Trend , müxbir İ.Xəlilova/
Azərbaycan hökuməti 2010-cu ildə neft sektorunun inkişaf proqnozlarını elan edib.
Cümə günü İqtisadi İnkişaf Nazirliyindən verilən məlumata görə, Azərbaycanda 2010-cu ildə 53,3 milyon ton neftin hasil ediləcəyi planlaşdırılır ki, bunun da 44,8 milyon tonu "Azəri-Çıraq-Günəşli" yatağından çıxarılan Azəri Light markalı neftin payına düşür. ARDNŞ öz şəxsi vəsaitləri hesabına dəniz və quru yataqlarından 8,5 milyon ton neft hasil etməyi planlaşdırır.
2009-cu ildə neft hasilatı 45 milyon ton səviyyəsində proqnozlaşdırılır, bunun da 36,5 milyon tonu yüngül neftin payına düşür, 8,5 milyon ton neft isə ARDNŞ tərəfindən istehsal ediləcək. Keçən il ölkədə 44,2 milyon ton neft hasil edilib.
2010-cu ildə Azərbaycanda qazın hasilatının 27 milyard kubmetrdən 27,2 milyard kubmetrədək artması planlaşdırılır. Bu il ARDNŞ-nin hasil etdiyi qaz 8 milyard kubmetr olacaq. "Şahdəniz" qaz-kondensat yatağının işlənməsinin birinci fazası çərçivəsində isə 9 milyard kubmetr qazın hasil ediləcəyi planlaşdırılır. Qalan hissəsinin isə "Azəri-Çıraq-Günəşli" dəniz yataqlar blokunda hasil ediləcəyi planlaşdırılır. 2009-cu ildə "Azəri-Çıraq-Günəşli" yatağında hasil edilən səmt qazının 10 milyard kubmetri təzyiqin saxlanması üçün təbəqələrdə sıxılacaq, qalan iki milyard kubmetri isə Azərbaycana veriləcək.
Ümumilikdə, 2010-cu ildə neft sektorunun artım sürəti 8,3 faiz səviyyəsində proqnozlaşdırılır.
Məqalə müəllifi ilə əlaqə ünvanı: [email protected]
