Azərbaycan, Bakı, 11 aprel /Trend, müxbir E.İsmayılov/
Bu həftə BP şirkəti Xəzərin Azərbaycan sektorundakı "Şahdəniz" qaz-kondensat yatağının genişmiqyaslı işlənməsi üzrə qabaqlayıcı qazma işləri çərçivəsində quyunun (SDX-07) qazılmasını bərpa edəcək. Bu barədə bazar ertəsi Trend-ə neft-qaz bazarındakı mənbə deyib.
Onun sözlərinə görə, hazırda quyunun dərinliyi 1101 metr təşkil edir.
"İndi karotaj işləri aparılır və 22 dümlük qoruyucu boru buraxılacaq", - mənbə bildirib.
Mənbənin sözlərinə görə, "İstiqlal" qurğusundan aparılan qazma işlərini artıq bu həftə bərpa etmək planlaşdırılır.
Quyunun qazılmasını cari ilin sonunadək başa çatdırmaq planlaşdırılır.
"Şahdəniz" layihəsi çərçivəsində ildə əlavə 16 milyard kubmetr qaz hasilatı üçün iki dəniz platforması quraşdırılacaq və 30 yeraltı quyu qazılacaq.
Yataqda ən yüksək hasilat 8,6 - 9 milyard kubmetr səviyyəsində proqnozlaşdırılır. Proqnozlara əsasən, yatağın işlənməsinin ikinci mərhələsində qaz hasilatının həcmini ildə 25 milyard kubmetrə qədər artırmaq olacaq.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%.
