Azərbaycan, Bakı, 20 noyabr /Trend, müxbir Emil İsmayılov/
2014-cü ilin ilk 9 ayında Azərbaycanın "Şahdəniz" qaz-kondensat yatağından 7,25 milyard kubmetr qaz və 1,72 milyon ton kondensat (13,8 milyon barel) hasil edilib. 2013-cü ilin yanvar-sentyabr aylarında bu göstərici müvafiq olaraq, 7,3 milyard kubmetr qaz və 1,4 milyon ton kondensat (10,9 milyon barel) olub.
Trend-in məlumatına görə, bu barədə BP-nin 2014-cü ilin yanvar-sentyabr aylarında fəaliyyətinin yekunu üzrə hesabatında deyilir.
Hesabata əsasən, yanvar-sentyabr aylarında yataqda orta sutkalıq qaz hasilatının həcmi 26,6 milyon kubmetr, orta sutkalıq kondensat hasilatının həcmi isə 50,45 min barel təşkil edib.
2013-cü ildə "Şahdəniz"də 9,8 milyard kubmetr qaz və 2,48 milyon ton kondensat (19,6 milyon barel), 2012-ci ildə isə 7,73 milyard kubmetr qaz və 2 milyon ton kondensat hasil olunub.
Yanvar-sentyabr aylarında layihə çərçivəsində əməliyyat xərcləri 371 milyon dollar, kapital xərcləri isə təqribən 2,8 milyard dollar olub. 2014-cü ildə layihə çərçivəsində əməliyyat xərcləri 435 milyon dollar, kapital xərcləri təqribən 3,9 milyard dollar səviyyəsində proqnozlaşdırılır.
Hesabata əsasən, kapital xərcləri yatağın işlənməsinin ikinci mərhələsi çərçivəsində işlərlə və Səngəçal terminalının genişlənməsi ilə bağlıdır.
2006-cı ilin sonundan ("Şahdəniz"də hasilatın başlanması) 2014-cü ilin III rübünədək dünya bazarlarına 55,2 milyard kubmetr qaz və 14,2 milyon tondan çox kondensat göndərilib.
"Şahdəniz" yatağının işlənməsinə dair müqavilə 1996-cı il iyunun 4-də imzalanıb. Yatağın qaz ehtiyatı 1,2 trilyon kubmetrdir. "Şahdəniz"də iştirak payları belədir: BP (operator - 28,8%), ARDNŞ (16,7%), Statoyl (15,5%), Total (10%), LUKOYL (10%), NİKO (10%), və TPAO (9%).
