Azərbaycan elektrik enerjisinin tədarükü ilə əlaqədar Türkiyəyə olan borcunu elə elektrik enerjisi ilə ödəyəcək. Trend in Türkiyə KİV-nə istinadən xəbər verdiyi kimi, Ankaradakı mənbələr bildirib ki, Türkiyə və Azərbaycan nümayəndələri 1992-ci ildən başlayaraq Türkiyənin Naxçıvan Muxtar Respublikasına (NMR) tədarük etdiyi 450 milyon kVt elektrik enerjisinə görə əmələ gəlmiş 165 milyon dollar borcun qaytarılması məsələsi ilə bağlı razılığa gəlib.
Razılaşmaya əsasən, borc NMR-dən Türkiyəyə elektrik enerjisi tədarük edilməklə qaytarılacaq. Tədarüklər 1 yanvar 2007-ci ildə başlanacaq və 10 il ərzində davam edəcək. Bu tarixdən başlayaraq Türkiyədən NMR-ə elektrik enerjisinin tədarükü dayandırılacaq.
Türkiyənin TETAŞ enerji şirkətinin nümayəndələri qeyd edib ki, hazırda Naxçıvana 40 MVt gücündə elektrik enerjisi tədarük olunur. Bu o deməkdir ki, 2007-ci ildən Türkiyənin Azərbaycanla sərhəd ərazilərinə 80 MVt gücündə elektrik enerjisi tədarük olunacaq. "Bu rəqəm İqdır vilayətinin tələbatını tam ödəyəcək", - deyə şirkətdən bildirilib.