Azərbaycan, Bakı, 4 aprel /Trend, müxbir H.Vəliyev/
Azərbaycanın "Telecom İnvest" telekommunikasiya şirkəti ölkənin "Delta Telecom" ilkin provayderinin simsiz genişzolaqlı WiMAX xidmətlərinin göstərilməsi hüququna sahib olub . Bu barədə Trend-ə bazar ertəsi "Telecom İnvest"dən məlumat verilib.
Şirkətin məlumatında deyildiyi kimi, xidmət tarifləri və alınan avadanlığın dəyəri dəyişməz qalır, simsiz WiMAX-a qoşulmaq istəyən istifadəçilərə isə şirkət simsiz WiMAX modeminin ikigünlük sınaq imkanını təqdim edir.
İlkin provayder "Delta Telecom"un simsiz WiMAX şəbəkəsi 2010-cu ilin əvvəllərində kommersiya istismarına buraxılıb.
Şirkət son istifadəçiyə xidmət göstərmək üçün 10 manatdan 100 manatadək nominal üzrə skretç kartlar və istifadəçi qurğuları (WiMAX modemləri) təqdim edib. WiMAX şəbəkəsinin buraxılış qabiliyyəti 2 Qbit/saniyə təşkil edir.
WiMAX şəbəkəsi Mobile WiMAX kimi tanınan və saatda 120 kilometrədək sürətlə yerini dəyişən mobil qurğular üçün nəzərdə tutulan 802.16e standartına əsaslanır.