Azərbaycan, Bakı, 28 aprel /Trend, müxbir H.Vəliyev/
Azərbaycanda qeydiyyata alınan radioelektron vasitələrin (REV) ümumi sayı 45 049 min ədədə çatıb. Trend xəbər verir ki, bu barədə bazar ertəsi Rabitə və Yüksək Texnologiyalar Nazirliyinin Dövlət Radiotezliklər İdarəsinin məlumatında deyilir.
Ötən ilin analoji dövrünün göstəriciləri ilə müqayisədə qeydiyyata alınan radioelektron vasitələrin sayı 11,8 faiz artıb.
DRİ-nin məlumatına görə, ilin əvvəlindən 806 ədəd REV qeydiyyata alınıb.
Aprelin 1-nə olan vəziyyətə görə, DRİ-nin qeydiyyatında 398 radiovasitə istifadəçisi durur.
DRİ-nin məlumatına görə, bazasında 398 müəssisə və təşkilat qeydiyyata alınıb. Onlardan 72-si dövlət, 268-i kommersiya, 28-i xarici müəssisə və təşkilatlar, 30-u isə fiziki şəxslərdir.
İdarə radioelektron avadanlıqların qeydiyyatı və istismarı üzərində nəzarəti həyata keçirir.
2014-cü ilin yanvar-mart aylarında DRİ-nin Efir nəzarəti şöbəsi tərəfindən 53 ədəd qeydiyyatsız radioelektron vasitə (REV) aşkar edilib.
Göstərilən dövrdə DRİ tərəfindən 174 müəssisə və təşkilata texniki baxış keçirilib. Qeydiyyatsız REV-in ümumi sayından 10 ədədi möhürlənib, yerdə qalan 43 ədədinin qeydiyyatı prosesi davam edir.
Qeydiyyatsız REV-dən istifadə edənlər barəsində 6 protokol tərtib olunub və onlarla bağlı müvafiq hüquqi tədbirlər görülüb.