Azərbaycan, Bakı, 02 aprel / Trend ", müxbir Q.Cəbiyev/ Beş siyasi qurumun təmsil olunduğu Məşvərət Şurası "Azadlıq" bloku ilə əməkdaşlıq məsələsini mümkünsüz sayır. "Bu blok boykot addımından imtina etsə belə, bizim onlarla əməkdaşlığımız mümkün görünmür", çərşənbə günü Trend "a Azərbaycan Demokrat Partiyasının (ADP) sədri, partiyanın prezidentliyə namizədi Sərdar Cəlaloğlu bildirib.
Məşvərət Şurasında Demokrat, Milli İstiqlal, Tərəqqi, Müsavat partiyaları və Azərbaycan Naminə İctimai Forum təmsil olunur. Qurum üzvləri oktyabrda keçiriləcək prezident seçkisində əməkdaşlıqla bağlı saziş imzalamaq niyyətindədir. Üç müxalif -Liberal, Xalq Cəbhəsi, Vətəndaş və İnkişaf partiyalarnın birləşdiyi "Azadlıq" bloku isə seçkini boykot etmək istəyir.
Cəlaloğlu bildirib ki, iki qurum arasında seçkiyə yanaşma məsələsindən başqa da ciddi fikir ayrılıqları var. "Blokun boykot addımı seçkilərdə rəqabət şəraitini məhdudlaşdırmayacaq" Cəlaloğlu əlavə edib.
"Azadlıq" blokunun həmsədri Əli Əliyev isə Trend "a deyib ki, blok Məşvərət Məclisi ilə əməkdaşlıqda maraqlı deyil.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya ötən ilin yanvarınadək iqtidara qarşı radikal müxalif mövqedə olub. Ötən ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını (ACP) yaradıblar.
Məqalə müəllifi ilə əlaqə ünvanı: [email protected]