Azərbaycan, Bakı,17 oktyabr/ Trend , müxbir D.Xatınoğlu/ Amerikanın qeyri-hökümət təşkilatı kimi fəaliyyət göstərən ABŞ-İran Şurası (AİŞ) (American-İranian Council)Tehranda ofis açmaq üçün İran DİN-ə müraciət edib.
AİŞ sədri Huşəng Əmir Əhmədi Trend - a bildirib ki, hazırda İranın xarici işlər nazirliyində müraciətə baxılır. "DİN müraciəti nəzərdən keçirərək, müvafiq instansiyalara - milli təhlükəsizlik, xarici siyasət orqanlarına və s.- göndərəcək. Bu proses iki-üç ay vaxt aparacaq, sonda, AİŞ-in Tehranda ofis açıb, fəaliyyət göstərməsi haqda qərar qəbul olunacaq" - deyə, Əmir Əhmədi cümə günü telefonla Vaşinqtondan bildirib.
Onun sözlərinə görə, son nəticəni proqnozlaşdırmaq mümkun deyil, lakin, AİŞ-ə Tehranda fəaliyyət göstərilməsinə icazə verilməsi ehtimalı az deyil.
ABŞ XİN birinci dəfədir ki, öz QHT-sinin İranda fəaliyyət göstərməsinə razılıq verib. Bundan əvvəl, AİŞ sədri bir neçə dəfə İrana səfər edib və İran prezidenti Mahmud Əhmədinejadla görüş keçirib. AİŞ 1997-ci ildən İran və ABŞ münasibətlərinin bərpasına çalışır.
Əmir Əhmədi əlavə edib ki, AİŞ-in İranda fəaliyyətinin böyük və əməli nəticələri ola bilər.
"Mən təsəvvür edirəm ki, ABŞ seçkilərindən sonra Vaşinqton-Tehran münasibətləri yaxşılaşmağa doğru gedəcək. Tərəflərin heç biri istəmir ki, müharibə baş versin, yaxud münasibətlər bərpa olunmasın. Hər iki ölkə çalışır ki, tərəflər arasındakı problemlər müzakirə yolu ilə həll olunsun. Tərəflər arasında sülhün bərpa olunmasında AİS -in rolu ola bilər"- deyə, AİŞ sədri bidlirib.
Onun fikrincə, İran əlehinə BMT TŞ - nin sanksiyasız Qətnaməsi İrana müsbət mesaj idi. Əmir Əhmədi hesab edir ki, Altılıq ölkələri İrana bir daha fürsət verdilər ki, nüvə proqramına dair mövqeyində bir sıra dəyişikliklər etsin.
AIŞ-in sədri bildirib ki, İsrail lobbisi də ABŞ - İran münasibətlərinin bərpasına mane ola bilməz. "İsrail lobbisi Amerikada güclüdür, çünki İran Amerikanın düşmənidir, başqa səbəb yoxdur. İran ABŞ - la əlaqələrini normallaşdırsa, İsrail lobbisi rəsmi Vaşinqtonu İran əleyhinə təhrik edə bilməz" - deyə, o hesab edir.
Əmir Əhmədi əlavə edib ki, ABŞ - da prezident seçkilərində Barak Obama qalib gəlsə, yəqin ki, Vaşinqton İranla müzakirələrə asanlıqla başlaya bilər. Onun sözlərinə görə, İranın daxili və xarici siyasətində ən yüksək vəzifəli şəxs Ali Dini Rəhbər Əli Xameneidir və ABŞ prezidenti birbaşa onunla müzakirəyə keçməlidir, yaxud Xamenei bu müzakirələrə müsbət rəyini bildirməlidir. "Bu səbəbdən də , Obamanın Əhmədinejadla birbaşa müzakirələr aparması lazım deyil, hər halda, son sözü Xamenei deyəcək" - deyə, Əmir Əhmədi hesab edir.
Məqalə müəllifi ilə əlaqə ünvanı: [email protected]
