Iran, Tehran, 28 yanvar / Trend , müxbir A.Namdari/ İran parlamenti enerji komissiyasının üzvləri bildiriblər ki, Budapeştdə keçirilən "Nabukko" layihəsi sammitində İranın iştirak etməməsinin səbəbini bilmirik.
"Biz Iranın Budabeştdə keçirilən sammitdə iştirak etməməsinin səbəbi haqda məlumatımız yoxdur",- deyə İran parlamentinin enerji komissiyasının üç üzvü Həsən Noruzi, Haşim Səvari və Hüseyn Zülənvar Trend -a müsahibəsində bildiriblər.
Yanvarın 27-də Budapeştdə Avropaya enerji tədarükü mənbələrinin diversifikasiyası üçün nəzərdə tutulmuş "Nabukko" qaz kəməri layihəsinin perspektivlərinə həsr olunmuş sammit işə başlayıb. Sammitdə layihənin iştirakçı ölkələrilə yanaşı, potensial qaz tədarükçüsü qismində çıxış edən ölkələrin dövlət rəsmiləri də iştirak ediblər. sammitdə Irandan nümayəndə iştirak etməyib. İki günlik sammitdə Avropa Birliyi və ABŞ nümayəndələri də iştirak edir.
İran parlament nümayəndələri enerji komissiyası və neft nazirliyinin birgə keçirəcəyi iclasdan sonra məsələ haqda məlumat verəcəklərinə söz veriblər.
Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Avropa İttifaqı ölkələrinə qaz ixracı nəzərdə tutulur. Qaz kəmərinin çəkilməsi 2010-cu ilə təyin edilib. Boru kəmərinin maksimal ötürmə gücü ildə 31 mlrd. kubmetr olacaq. Layihənin iştirakçıları OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botas və Almaniyanın RWE şirkətləridir. Onların hər biri bərabər paya - 16,67 faiz paya malikdir.