Azərbaycan, Bakı, 20 noyabr /Trend, müxbir T.Cəfərov/
İranın İslahatçılar düşərgəsinin rəhbəri, sabiq prezident Məhəmməd Xatəmi qarşıdakı parlament seçkilərinə hazırlıq işlərinin görülməsinə göstəriş verib. Bu barədə İranın "Javan-online" qəzetinin rəsmi saytı məlumat verir.
Xatəmi prezident olduğu dövrdə ölkənin əyalət başçısı vəzifəsində çalışan şəxslərlə görüşündə onlara IX çağırış parlament seçkilərində İslahatçılar düşərgəsində birliyin vacibliyindən danışıb. "Ümid edirəm, yaxın beş-altı ayda ölkənin siyasi atmosferində islahatçıların xeyrinə əhəmiyyətli dəyişikliklər olacaq", - Xatəmi deyib.
O, islahatçıların IX çağırış parlament seçkilərində iştirak etməsi üçün fəaliyyətlərini artırmasının zəruriliyindən danışıb. "Əyalətlərdə parlament seçkilərində iştirak etmək üçün səlahiyyətli şəxslərin siyahısı hazırlanmalıdır", - Xatəmi sabiq əyalət başçılarına göstəriş verib.
Sabiq prezident deyib ki, İslahatçılar üçün gələcək parlament seçkilərində əlverişli fürsət var, bunun üçün İslahatçılar bütün potensialları ilə bu seçkilərdə iştirak etməlidir. Xatəmi 1997-2005-ci illərdə İranın prezidenti olub.
İranda parlament seçkiləri (İranın İslami Məşvərət Məclisi ) dörd ildən bir keçirilir. İranda VIII çağırış parlament seçkiləri 14 mart 2008-ci ildə keçirilib. Məclisin tərkibində hazırda 290 deputat var. Məclisin sədri Əli Laricanidir.
İranda əsas rəqiblər İslahatçılar və Mühafizəkarlar cinahlarıdır (İslahatçılar və Üsulgəralar). 2009-cu il iyunun 12-də İranda keçirilən prezident seçkilərində Üsulgəralar cinahından olan hazırkı dövlət başçısı Mahmud Əhmədinejad 62,5, onun əsas rəqibi islahatçı namizəd Mirhüseyn Musəvi isə 33,75 faiz səs toplayıb. Lakin Musəvi seçkilərdə ciddi saxtakarlığa yol verildiyini əsas gətirərək, nəticələri tanımadığını bəyan edib. Onun tərəfdarları da nəticələrə etiraz olaraq Tehran küçələrində aksiyalara başlayıblar. Aksiyalarda polislə toqquşmalar qeydə alınıb. İslahatçı namizədin xeyli tərəfdarının həbs olunduğu bildirilir.
