Bakı. Trend:
Azərbaycanın Birləşmiş Ərəb Əmirliklərindəki (BƏƏ) səfiri Mahir Əliyev bu ölkənin Xarici İşlər və Beynəlxalq Əməkdaşlıq Nazirliyinin Xarici yardımlar üzrə məsələlər idarəsinin rəisi Raşid Mohamed Əl-Hemeiri ilə görüşüb.
Səfirlikdən Trend-ə bildirilib ki, səfir ərazilərimizin erməni işğalından azad edilməsi, işğal dövründə Ermənistan tərəfindən törədilmiş dağıntılar və cari ilin sentyabr ayında ölkəmizə qarşı həyata keçirilmiş təxribatlar barədə həmsöhbətinə ətraflı məlumat verib. İstər işğal illərində, istərsə də 44 günlük Vətən müharibəsindən sonra Ermənistan tərəfindən Azərbaycan ərazilərinin kütləvi şəkildə minalarla çirkəndirildiyi diqqətə çatdırılıb. Xeyli sayda hərbçilərimizin və mülki əhalimizin minaların qurbanı olduğu bildirilib.
Diplomat qeyd edib ki, hazırda işğaldan azad edilmiş ərazilərdə geniş quruculuq işləri aparılır və Azərbaycanın erməni təcavüzü nəticəsində didərgin düşmüş minlərlə vətəndaşının ən qısa vaxt ərzində öz doğma yurdlarına qaytarılması ölkə səviyyəsində planlaşdırılıb. Lakin bu yöndə əsas maneə azad edilmiş ərazilərimizin minalarla çirkləndirilməsidir. Ərazilərimizin minalardan təmizlənməsi istiqamətində ölkəmizdə xüsusi qurum – ANAMA fəaliyyət göstərir. Görüş çərçivəsində “Azərbaycanda mina təmizləmə fəaliyyəti: prioritetlər və ehtiyaclar” adlı hesabat qarşı tərəfə təqdim edilib.
Ərazilərimizin minalardan təmizlənməsi üçün beynəlxalq dəstəyə ehtiyacın olduğunu qarşı tərəfin diqqətinə çatdırılıb, donor ölkə və təşkilatlar tərəfindən bu məqsədlə ediləcək maliyyə, texniki və digər yardımların daha çox insan itkisinin qarşısını alacağı və məcburi köçkünlərin öz evlərinə qayıdışını tezləşdirəcəyi bildirilib.
BƏƏ rəsmisi ətraflı məlumata görə təşəkkürünü ifadə edərək, son illər ərzində ikitərəfli münasibətlərin inkişafından məmnun olduqlarını bildirib. O, Azərbaycan və BƏƏ-nin xalqları və liderləri arasında yaxın qardaşlıq münasibətlərinin olduğunu vurğulayaraq, qeyd edilən sahədə BƏƏ tərəfindən Azərbaycana mümkün dəstəyin göstərilməsi məsələsinə baxıldığını və yaxın vaxtlarda nəticəsi barədə Azərbaycan tərəfinə məlumat veriləcəyini diqqətə çatdırıb.