Hakimlər tərəfindən qətnamələrin qəbul edilməsində müəyyən problemlər var. Trend in məlumatına görə, bu sözləri Azərbaycan Respublikası Ali Məhkəməsinin sədri Ramiz Rzayev söyləyib.
Məhkəmə sədrinin sözlərinə görə, Ali Məhkəmənin noyabrın 24-də keçiriləcək növbəti Plenumunda bu məsələnin müzakirəsi gündəliyə çıxarılacaq. "Sumqayıt, Suraxanı və Əlibayramlı məhkəmələrinin məruzələrini dinləcəyik. Bundan əlavə, vətəndaşlar tərəfindən hakimlər barədə verilən etirazlar müzakirə ediləcək və müvafiq qərarlar qəbul olunacaq", - deyə məhkəmə sədri bildirib. İclasda həmçinin Nizami rayon Məhkəməsinin hakimi Vilayət Nadirovun Məhkəmə Şurasının çıxardığı qərarla bağlı şikayətinə də baxılacaq.
Ramiz Rzayev qeyd edib ki, Məhkəmə Hüquq Şurasının iclası isə noyabrın 15-nə planlaşdırılıb. İclasda hakimliyə namizədlərin imtahanlarının keçirilməsi ilə bağlı bəzi texniki məsələlər müzakirə olunacaq. "Ola bilsin ki, Məhkəmə Hüquq Şurasının növbəti iclasında fəaliyyətində yeni nöqsanlar aşkar edilmiş bəzi hakimlərlə bağlı məsələlər ətrafında da müzakirələr aparılsın".
