Azərbaycan, Bakı, 25 iyun /Trend, müxbir Elçin Mehdiyev/
Bakının Həsən Əliyev küçəsinin Koroğlu Rəhimov küçəsi ilə kəsişməsindən Cəlil Məmmədquluzadə küçəsi ilə kəsişməsinə qədər olan hissəsində təmir işləri tam yekunlaşıb. Bunu Trend-ə Nəqliyyat Nazirliyi "Azəryolservis" ASC-nin mətbuat xidmətinin rəhbəri Pünhan Mürsəliyev deyib.
İyunun 23-ü axşam 00:00-dan yolun Cəlil Məmmədquluzadə küçəsi ilə kəsişməsindən Azər Əliyev küçəsi ilə kəsişməsinə qədər olan hissəsinin bağlandığını xatırladan P.Mürsəliyev qeyd edib ki, hazırda işlər intensiv qaydada davam etdirilir: "Kommunikasiya xətləri üçün qazılmış xəndəklər lazımi materiallarla doldurularaq kipləşdirilib və üzərində 20 sm qalınlığında asfalt vurularaq yolun səviyyəsi ilə eyniləşdiriləcək, paralel bardürlərin mərmər bardürlərlə əvəzlənməsi işləri, kommunikasiya quyularının dəmir-beton piltələrinin dəyişdirilməsi və s. işlər davam etdirilir".
Onun sözlərinə görə, yaxın bir-iki gün ərzində köhnə asfalt-beton örtüyü frez mexanizmi vasitəsilə qaşınacaq və yeni asfalt-beton örtüyü döşəniləcək.
P.Mürsəliyev əlavə edib ki, "Azəryolservis" ASC bəzi KİV-lərin və sürücülərin bununla bağlı narahatçılığına heç bir ehtiyac görmür. ASC tərtib olunmuş qrafik əsasında öz işlərin davam etdirir: "Yaxın bir həftə ərzində Cəlil Məmmədquluzadə küçəsindən Azər Əliyev küçəsinə qədər olan hissədə təmir işləri tamamlanacaq və bundan sonra növbəti 5-6 gün ərzində ümumiyyətlə, Azər Əliyev küçəsi ilə kəsişmədən Tbilisi prospektinə qədər olan hissədə işlər yekunlaşacaq. Bununla da Həsən Əliyev küçəsində işlər tamamilə yekunlaşacaq. Bəzi KİV-lər yazır ki, guya yol polisi ilə problemlər var. Bütün bunlar əsassızdır. Heç bir problem yoxdur".