Azərbaycan, Bakı, 12 sentyabr / Trend , müxbir İ.Xəlilova /
Bazar ertəsindən etibarən Azərbaycan hökuməti və Fransanın BNP Paribas bankı arasında Muğanlıdan Yevlaxa kimi (üçüncü hissəsinin inşası - M3) və Yevlax-Zaqatala-Gürcüstan sərhədinə kimi (M4 hissəsi) avtomobil magistralının inşası layihəsi üzrə ötən ilin yayında imzalanan kredit müqaviləsinin yeni şərtlərinə dair danışıqlar başlayır. Bu barədə cümə günü hökumətdən bildirilib.
[Fransız bankları qlobal maliyyə böhranı ilə bağlı olaraq öz kredit tələblərini və şərtlərini kəskinləşdiriblər.]
"Bank hökumətə yeni kredit şərtləri təklif edib və sentyabrın 14-dən biz onların müzakirəsinə başlayırıq. Bununla əlaqədar olaraq, Bakıda BNP Paribasın nümayəndələri ilə görüş keçiriləcək", - hökumətdən bildirilib.
Kredit şərtlərinə yenidən baxılmaqla yanaşı, BNP Paribas eyni zamanda Azərbaycan hökumətinə maliyyələşdirmə həcmini əvvəl təsdiqlənmiş 320 milyon dollardan 270 milyon dollaradək azaltmağı təklif edib. Bu halda maliyyələşmənin çatışmayan hissəsini Azərbaycan hökuməti öz üzərinə götürəcək. Bu barədə danışıqlara yaxın olan mənbədən bildirilib.
İlkin olaraq bank 400 milyon dollar təklif etmişdi ki, onun da 80 milyon dolları kommersiya şərtləri ilə nəzərdə tutulmuşdu. Azərbaycan hökuməti kreditin kommersiya hissəsindən imtina edib.
Bu yol layihələrinin həyata keçirilməsi üçün 320 milyon dolların ayrılması barədə BNP Paribas və Azərbaycanın Nəqliyyat Nazirliyi arasında kredit müqaviləsi 2008-ci il iyunun 13-də Bakıda imzalanıb. Fransa bankı maliyyə yardımını İsrailin ASHRA sığorta korporasiyasının dəstəyi ilə təqdim edib. Müqavilənin şərtlərinə əsasən, kreit dörd il güzəştli olmaqla 14 il müddətinə, illik libor+0,45 faiz dərəcəsi ilə təqdim edilib.
Uzunluğu 156 kilometr təşkil edən Muğanlıdan Yevlaxa kimi olan avtomobil yolunun ümumi dəyəri 250 milyon dollardır. Uzunluğu 164 kilometr olan ikinci yol layihəsi - Yevlax-Zaqatala-Gürcüstan sərhədinə kimi avtomobil magistralı layihəsinin ümumi dəyəri dəqiqləşdirilir. Azərbaycanda layihələrin dəyərinin bahalaşmasına 2008-ci ildən beynəlxalq kreditlər hesabına həyata keçirilən bütün xidmətlər və idxal məhsullarına əlavə dəyər vergisinin (ƏDV) tətbiq edilməsi təsir edib.
Bu, BNP Paribas ilə yol layihəsi üzrə ilk kredit müqaviləsidir.
Məqalə müəllifi ilə əlaqə ünvanı: [email protected]
