Azərbaycan, Bakı, 19 noyabr / Trend , müxbir Ü.İsmayılova/
Azərbaycanda yanvar-oktyabr aylarında avtomobil idxalının 36,8 faiz azalması ölkənin sığorta bazarına cüzi təsir göstərib. Bu barədə cümə axşamı "Azergarant" SŞ-nin İdarə Heyətinin sədrinin müavini Şükür Hüseynov bildirib.
"Ölkədə avtomobil idxalının azalmasını yalnız portfelini təxminən yarısını girov avtomobillərin sığortası hesabına formalaşdıran şirkətlər hiss ediblər. Onların zərəri yəqin ki, 35-40 faiz səviyyəsində olub", - Hüseynov deyib.
Onun sözlərinə görə, Azərbaycanda icbari olaraq əsasən girov avtomobillər sığortalanır, digər avtomobil sahibləri nəqliyyat vasitəsinin sığortalanmasına o qədər də ciddi yanaşmırlar.
Azərbaycanda 28 sığorta və bir təkrar sığorta şirkəti fəaliyyət göstərir. Yanvar-sentyabr aylarında fəaliyyət yekunlarına əsasən, şirkətlərin haqları 130,18 milyon manat, ödəmələri 38,22 milyon manat təşkil edib. Avtomobil sığortası üzrə sığortaçıların haqlarının həcmi doqquz ay ərzində 23,67 milyon manat, ödəmələri isə 12,35 milyon manat təşkil edib.
Noyabrın 19-na olan rəsmi məzənnə 0,8027 AZN/USD təşkil edir.
Məqalə müəllifi ilə əlaqə ünvanı: [email protected]