Azərbaycan, Bakı, 17 sentyabr /Trend, müxbir N.İsmayılova/
"Azərbaycanın dövlət büdcəsi haqqında" qanunda nəzərdə tutulmuş qaydaya görə, 2011-ci il üzrə büdcə proqnozları parlamentə oktyabrda təqdim olunacaq. Bu barədə cümə günü parlamentin İqtisadi siyasət komitəsinin sədri Ziyad Səmədzadə bildirib.
"Əsasında 2011-ci ilin dövlət büdcəsinin və icmal büdcəsinin proqnozlarının formalaşdığı neftin bir barelinin qiymətinin seçimi zamanı hökumət ciddi araşdırmalar aparır. Dünya bazarlarındakı canlanma neftə tələbin artmasına gətirib çıxarıb və bu gün neftin bir barelinin qiyməti 75-80 dollar arasında dəyişir, ona görə də neftin qiymətinin 60 dollar səviyyəsində proqnozu bizi risklərdən xilas edir, imkanları genişləndirir və neft gəlirlərinə çox da etibar etməməyimiz üçün bizi səfərbər edir", - Səmədzadə bildirib.
Neft qiymətlərinin dəyişməsi konyunkturasının dünya prosesləri fonunda Azərbaycan hökuməti 2011-ci il üçün dövlət büdcəsinin və ümumi büdcənin proqnozları əsasında formalaşdırılan qiymət proqnozunu 60 dollar səviyyəsində müəyyənləşdirib. Bu barədə çərşənbə axşamı ölkə hökumətindən bildiriblər. 2010-cu il üçün büdcə proqnozlarına edilən dəyişikliklər nəticəsində neftin qiyməti bir barel üçün 45 dollardan 65 dollara qaldırılıb.
2009-cu ilin dövlət büdcəsinin proqnozları neftin qiymətinə uyğun olaraq bir barel üçün 70 dollar səviyyəsində formalaşdırılıb, lakin 2008-ci ildən etibarən dünya bazarlarında neftin qiyməti aşağı düşərək 40-50 dollara çatıb. Lakin son vaxtlar "Azəri-Çıraq-Günəşli" yataqlar blokunda hasil edilən Azərbaycanın yüngül neftinin qiyməti bir barel üçün orta hesabla 77 dollar təşkil edib. 2010-cu ilin yekunlarına görə, neftin orta qiyməti 70-75 dollar səviyyəsində gözlənilir.
2010-cu ilin dövlət büdcəsinin proqnozlarına edilən düzəlişlərə əsasən, gəlirlər 1,49 milyard manat artaraq 11,505 milyard manata çatdırılıb. Büdcə xərcləri 1,11 milyard manat artırılaraq 12,275 milyard manat təşkil edib.
Edilən dəyişikliklər nəticəsində büdcə kəsiri 1,249 milyarddan 770,3 milyard manata qədər azaldılıb ki, bu da dövlət büdcəsinin kəsirinin ÜDM-in 3,9 faizindən 2,3 faizə qədər azaldılması deməkdir.
Sentyabrın 17-nə olan rəsmi məzənnə 0,8033 AZN/USD təşkil edir.