Azərbaycan, Bakı, 25 iyun /Trend/
İstehlakçılara verilən içməli suyun keyfiyyət göstəricilərinin qəbul edilmiş standartlara uyğunluğunu təmin etmək məqsədilə Bakı şəhərindəki mərkəzi və məhəllədaxili su anbarlarının yuyulması davam etdirilir.
"Azərsu" ASC-nin mətbuat xidmətindaən bazar ertəsi Trend-ə verilən məlumata görə, 2012-ci ilin mart ayından indiyə qədər "+69 Şərq", "+110 Qərb" və Maştağa mərkəzi su anbarlarının yuyulması başa çatdırılıb. Bununla yanaşı, ASC-nin balansında olan məhəllədaxili su anbarlarının da yuyulması təmin edilib.
Tərtib olunmuş qrafikə uyğun olaraq, Nərimanov rayonunda 30, Binəqədidə 28, Yasamalda 27, Suraxanıda 24, Nizamidə 23, Xətaidə 9, Nəsimidə 6 və Səbail rayonunda 2 məhəllədaxili anbar yuyularaq dezinfeksiya olunub və proses kompleks şəkildə aparılaraq ciddi nəzarət altında həyata keçirilib.
Yuyulma prosesində anbarlar tamamilə boşaldılıb və onların dib hissəsi lil çöküntülərindən təmizlənib. Daha sonra anbarların istismara yararlı olub-olmaması mütəxəssislər tərəfindən yoxlanılıb, təhlükə doğura biləcək hallar müəyyənləşdirilərək təmir-bərpa işləri aparılıb. Dezinfeksiya işlərindən sonra anbarlar suyun keyfiyyətinə dövlət nəzarətini həyata keçirən Sanitar və Epidemilogiya Mərkəzinin təqdim etdiyi arayışlar əsasında yenidən istismara buraxılıb.
