Azərbaycan, Bakı/ Trend müxbir İ.Xəlilova / Asiya Inkişaf Bankının (AİB) 40 illik toplantısında iştirak etmək üçün Azərbaycanın maliyyə naziri Samir Şərifov Kiotoya (Yaponiya) səfər edib. Bu barədə cümə günü Maliyyə Nazirliyindən məlumat verilib. Tədbir mayın 5-7-ə təyin olunub.
Toplantıda iştirakla yanaşı Samir Şərifov Yaponiyanın maliyyə naziri Koji Omi, Asiya Bankınln prezidenti Xaruiko Kuroda, vitse-prezident Likuinçin, baş direktor Xuan Mirando, Azərbaycan, Avstraliya, Kamboca və digər ölkələr üzrə səsvermə qrupunun direktoru Stefan Sedviklə görüşməyi planlaşdırır.
AİB 1966-cı ildə təsis olunub və 67 üzvü var. Bankın mənzil qərargahı Filippinin paytaxtı Manilada yerləşir. Azərbaycan Asiya Bankına 22 dekabr 1999-cu ildə qəbul olunub və 0,5 faiz iştirak payına malikdir.
Bankın aparıcı səhmdarları Yaponiya, ABŞ (ümumi səhm kapitalının 31,2 faizi), Hindistan, Çin (12,8 faiz), Avstraliya, Cənubi Koreya, Kanada (16 faiz) və digər ölkələr hesab olunur.
