Azərbaycan, Bakı, 18 iyun/ Trend Cap , müxbir E.İsmayılova/ Azərbaycanda "Şahdəniz" qaz-kondensat yatağının işlənilməsi layihəsinin ikinci mərhələsi çərçivəsində ümumi optimal hasilat həcmi 20-21 mlrd. kubmetr təşkil edir. Bu barədə Azərbaycanın sənaye və energetika naziri Natiq Əliyev məlumat verib. O, hasilatın artmasının mümkünlüyünü istisna etmir.
"Əminəm ki, yatağın işlənilmə konsepsiyasına yenidən baxılarsa, "Şahdəniz"in işlənilməsinin digər metodları tətbiq edilərsə, bu rəqəmi artırmaq olar", - Əliyev söyləyib.
"Şahdəniz" layihəsinin ikinci mərhələsinin işlənilməsinə dair qərarı xarici şirkətlər və ARDNŞ-dan ibarət konsorsium qəbul edir. "Hazırda təkliflər hazırlanır, kəşfiyyət quyularının nəticələri analiz edilir. Onlar ikinci fazanın miqyası barədə mülahizə yürütməyə imkan verəcək", - nazir bildirib. "Şahdəniz" layihəsinin ikinci mərhələsi çərçivəsində hasilata 2012-ci ildə başlamaq nəzərdə tutulur.
"Düşünürəm ki, hər şey bazardakı vəziyyətdən, bizim bu qazın satışı üzrə müqavilələri nə dərəcədə uğurla alacağımızdan, bu gün təbii qazın Avropaya, o cümlədən İtaliyaya nəqli üçün nəzərdə tutulan layihələrin, "Nabukko" və digər layihələrin hansı vəziyyətdə olacağından asılıdır", - Əliyev söyləyib.
Bu gün "Şahdəniz" yatağından hasilat dörd quyudan sutkada 21-22 mln. kubmetr təşkil edir.
"Şahdəniz" dəniz yatağının işlənilməsinə dair müqavilə 1996-cı il iyunun 4-də imzalanıb. Layihənin iştirakçıları: BP (texniki operator) - 25,5 faiz, Statoil Hydro (kommersiya operatoru) - 25,5 faiz, NICO - 10 faiz, Total - 10 faiz, LukAgip - 10 faiz, TPAO - 9 faiz, ARDNŞ - 10 faiz.
Bu yataqdan qaz hasilatı 2006-cı ilin dekabrında başlayıb. Qaz Cənubi Qafqaz qaz kəməri ilə Gürcüstan və Türkiyəyə nəql olunur. Azərbaycan da həmçinin qazın alıcısı kimi çıxış edir. Birinci mərhələdə hasilatın zirvəsində yataqdan 8,6 mlrd. kubmetr qaz hasil etmək nəzərdə tutulur. Bu həcmlər Azərbaycan, Gürcüstan və Türkiyəyə satılacaq. 2012-ci ildən sonra başlayacaq ikinci mərhələ çərçivəsində hasilat 20 mln. kubmetrədək artırılacaq.
Müəlliflə əlaqə saxlamaq üçün elektron ünvan: cap
