Azərbaycan, Bakı, 25 dekabr/ Trend , müxbir E.İsmayılov/ Xəzər dənizinin Azərbaycan sektorundakı "Mərkəzi Azəri" yatağında fəaliyyət göstərən üç quyudan sutkalıq neft hasilatı 80 min barel təşkil edir, - hökumətdəki mənbə deyib.
Yanvar ərzində "Mərkəzi Azəri"dəki platforma öz fəaliyyətini tam bərpa edəcək, - SOCAR şirkətinin (Azərbaycanın Dövlət Neft Şirkəti) rəhbəri Rövnəq Abdullayev əvvəllər bildirib. Cari həftənin sonunadək platformada daha iki quyunu işə salmaq planlaşdırılır.
"Azəri - Çıraq - Günəşli" (AÇQ) yataqlar blokunun işlənilməsi layihəsinin operatoru BP şirkətidir.
Bu gün AÇQ yatağından neft hasilatının həcmi sutkada 650 min barel təşkil edir. Yataqdakı platforma dayandırılanadək bu rəqəm təxminən 900 min barelə bərabər olub.
AÇQ yatağının işlənilməsinin operatoru BP şirkəti sentyabrın 17-də dənizin səthinə qaz tullantılarının aşkar edilməsi ilə əlaqədar, "Mərkəzi Azəri" yatağında neftin hasilatını dayandırıb və personalı yataqda quraşdırılmış platformadan köçürüb. Bundan əlavə, ehtiyat tədbirləri məqsədilə yatağın qərb hissəsində də - "Qərbi Azəri" platformasından da hasilat dayandırılıb. Sonradan yatağın qərb hissəsində hasilat bərpa edilib.
AÇQ yataqlarından Bakı - Tbilisi - Ceyhan boru kəməri ilə ixrac olunan Azeri Light növlü neft hasil olunur.
Müəlliflə əlaqə saxlamaq üçün elektron ünvan: [email protected]