Azərbaycan, Bakı, 17 yanvar /Trend, müxbir E.İsmayılov/
Yaxın günlərdə ARDNŞ-nin (Azərbaycan Respublikası Dövlət Neft Şirkəti) Heydər Əliyev adına Neft Emalı Zavodu Avro-3 ekoloji standartlarına müvafiq dizel yanacağının istehsalı üçün vacib tədbirlərə aid sənəd təqdim edəcək. Bu barədə bazar ertəsi neft-qaz bazarındakı mənbə məlumat verib.
Onun sözlərinə görə, işlər dizel yanacağının istehsalı üzrə zavodun hazırkı imkanları, həmçinin, Avro-3 standartlarına uyğun istehsal üçün fəaliyyətin tədqiqini özündə birləşdirəcək.
Bundan əvvəl ARDNŞ-nin yüksəkvəzifəli nümayəndəsinin dediyi kimi, Avro-3 standartları üzrə dizel yanacağına keçid çox vaxt almasa da, böyük həcmdə vəsait tələb edəcək.
"Raport yaxın 20 gündə ARDNŞ-yə veriləcək. Ona zavodun imkanları haqqında, həmçinin, Avro-3 standartlarına müvafiq dizel yanacağı istehsalına necə nail olmaq barədə məlumat daxil olacaq", - mənbə bildirib.
Mənbə dizel yanacağının istehsalında yeni istehsal prosesinin tətbiqi imkanlarını istisna etməyib.
ARDNŞ-nin yüksəkvəzifəli nümayəndəsinin dediyi kimi, dizel yanacağının Avro-3 standartları üzrə istehsalı xüsusilə katalizatorların dəyişilməsi hesabına mümkün olacaq və şirkətə 10 milyon dollara başa gələcək.
Avro-3 standartlarına müvafiq dizel yanacağı istehsalını ARDNŞ 2011-ci ilin sonuna qədər həyata keçirməyi planlaşdırır. Hazırda ARDNŞ-nin istehsal etdiyi dizel yanacağı Avro-2 standartlarına uyğundur.
2010-cu ildə ARDNŞ 2,42 milyon ton həcmində dizel yanacağı istehsal edib. Bu göstərici 2009-cu ildə 2,22 milyon ton olub.