Azərbaycan, Bakı, 2 oktyabr /Trend, müxbir H.Vəliyev/
İlin sonunadək "Azericard" prosessinq mərkəzi mobil bankinqin (bankçılıq) yeni versiyasını təklif edəcək. Bu barədə Trend-ə prosessinq mərkəzinin biznesin inkişafı üzrə rəhbəri Cahangir Məmmədov deyib.
Onun sözlərinə görə, yeni versiya xeyli geniş və rahat olmaqla, SİM-kartı dəyişmədən əlavə xidmətlərdən istifadə etməyə imkan verəcək.
"İndi SİM-kartları öz adlarına qeydiyyatda olmayan abonentlər bu xidmətdən istifadə edərkən problemlərlə qarşılaşırlar. Yeni versiyada bu problem tamamilə aradan qaldırılacaq. Mobil bankinqin yeni versiyası Azərbaycanın bütün mobil operatorlarının şəbəkəsində xidmət göstərməyə imkan verəcək", - Məmmədov qeyd edib.
Mobil bankinq xidməti sutka ərzində onlayn rejimdə hesabın balansını yoxlamağa, hesab üzrə əməliyyatların hesabatlarını formalaşdırmağa, elektrik enerjisi, mobil və stasionar rabitəyə, internet xidmətlərinə görə ödənişləri etməyə, pul vəsaitlərini kartdan karta köçürməyə, elekton aviabiletin ödənişini etməyə və hər aparılan əməliyyat üçün (hesabdan vəsaitin çıxarılması və ya daxil olması) SMS-bildiriş almağa imkan verir.
Hazırda mobil bankinq xidmətini Azərbaycan Beynəlxalq Bankı, Respublika Bankı, AGBank, AtaBank, Bank of Azerbaijan, Bank Standard, Nikoil Bank, ParaBank və Xalq Bank göstərirlər.
İndi xidmətlərdən istifadə etmək üçün "Azercell Telekom"un şöbələrində SİM-kart almaq və ya "MobilBank" əlavəsi ilə dəyişmək lazımdır. Bundan sonra plastik kartı verən bankın filialına müraciət etmək və xüsusi formanı doldurmaq lazımdır. Bank "MobilBank"dan istifadə üzrə təlimat verəcək və xidmətə qoşacaq.
"MobilBank" sistemində bütün ötürülən məlumat şifrələşdirilir. Nömrə sahibləri PİN-kodu formalaşdırır, identifikasiya (eyniləşdirmə) üçün isə yalnız istifadəçiyə məlum olan paroldan istifadə olunur.
