Azərbaycan, Bakı, 4 iyul /Trend, müxbir Hüseyn Vəliyev/
Azərbaycanın prosessinq mərkəzi "MilliKart" internet ödəmələrinin fırıldaqçılıq hallarından qorunması üçün təhlükəsizlik sistemini gücləndirib. Bu barədə Trend mərkəzə istinadən məlumat verir.
Mərkəzin "3D Secure" texnologiyasını təkmilləşdirməsi fırıldaqçılıq hallarından müdafiə üzrə təhlükəsizlik sisteminin yüksək səviyyəyə çatmasına və internet ödəmələrinin təhlükəsizliyinin təmin edilməsinə şərait yaradıb.
Xidmətlərdən istifadə etmək üçün müştəri öz telefon nömrəsini ona xidmət göstərən bankda qeydiyyatdan keçirməli və "3D Sign up" səhifəsində qeydiyyatdan keçərək 3D şifrə təyin etməlidir. Qeydiyyatdan keçdikdən sonra onlayn mağazalarda ödəmə zamanı istifadəçi xüsusi 3D şifrəsini daxil edərək əməliyyatı uğurla başa vura bilər.
Müştəri tərəfindən qoyulmuş şifrə sabitdir və heç bir dəyişikliyə məruz qala bilməz.
Prosessinq mərkəzi, həmçinin dinamik şifrələrin verilməsinə başlayıb. Dinamik şifrənin özəlliyi ondadır ki, hər ödəmə zamanı müştərinin qeydiyyatdan keçmiş nömrəsinə təsadüfi yaradılmış 6 işarəli bir dəfə istifadə olunan şifrə gəlir. Müştəri həmin şifrəni daxil edərək eyniləşdirmə aparır.
