Azərbaycan, Bakı, 25 sentyabr / Trend , müxbir E.Tariverdiyeva/ Gürcüstan Parlamentinin eks - spikeri Nino Burcanadzenin fəal siyasi həyata qayıtmağa dair qərarı, növbədənkənar seçkilər olacağı təqdirdə, onu prezident Mixail Saakaşviliyə əsas rəqib edəcək.
"Nino Burcanadze Saakaşvili üçün, onu gələcəkdə əvəz edə biləcək təhlükəli rəqib olmağa başlayır", - deyə Gürcüstan üzrə britaniyalı ekspert Kseniya Skvortsova (Ksenia Skvortsova) bildirib.
Gürcüstan Parlamentinin eks - spikeri Burcanadze yaxn günlərdə partiyasının yaradılması barədə bəyanat verəcək. Tbilisinin "Kvela siaxle" qəzetinə verdiyi müsahibəsində o, bildirib ki, bu istiqamətdə "intensiv məslələhləşmələr aparılır və ictimaiyyət yaxın gələcəkdə onların yekunları barədə məlumatlandırılacaq".
Burcanadze və Gürcüstan prezidenti Mixail Saakaşvili 2004 - cü ildə baş verən "Qızıl gül inqilabı" nın əsas liderləri olublar. Onun spiker olduğu parlament də prezidentin partiya fraksiyasına daxil idi. Bu illər ərzində Burcanadze iki dəfə prezidentin vəzifələrini icra edib.
O, ötən ilin noyabrında Tbilisidə müxalifət nümayişlərinin sərt şəkildə yatırılmasından sonra, hazırkı rejimdən uzaqlaşdı. Mayda keçirilən parlament seçkilərində hakim partiyanın parlament siyahısında liderlikdən imtina edəndən sonra, keçmiş spiker "Demokratik İnkişaf Fondu" Qeyri-Hökumət Təşkilatını yaratmaq qərarına gəldi.
Cənubi Osetiya və Abxaziyaya görə baş verən və minlərlə insanın həlak olduğu gürcü - rus münaqişəsindən sonra Saakaşvilinin keçmiş silahdaşı Burcanadze "Financial Times Deutshland" - a müsahibəsində bildrib ki, ölkə belə bir faciəni yaşayıbsa, insanların həqiqəti bilmək hüququ var. O əlavə edib ki, prezident Saakaşvili müharibəyə görə "olduqca çətin vəziyyətə düşüb".
"Əsas Gürcüstanın müharibədən qaçmaq imkanının olub - olmadığını və hakimiyyətin bu dramdan yan keçmək üçün nələr edə biləcəyini müəyyən etməkdir", - deyə o bildirib.
Burcanadzenin öz partiyasını yaratmaq bəyanatını müşhidəçilər onun Gürcüstanın siyasi həyatına qayıtması kimi dəyərləndirdilər. Bəzi analitiklər növbədənkənar seçkilər olacağı təqdirdə, onun prezident postunu tutacağını güman edirlər.
Material hazırlanarkən Burcanadzedən şərh almaq mümkün olmayıb.
Müstəqil gürcü eksperti Soso Sintsadze hesab edir ki, Burcanadze Fondunun Gürcüstanın eks -spikerinin rəhbərlik edəcəyi yeni siyasi qüvvənin yaradılması ilə bağlı məsləhətləşmələrə dair rəsmi bəyanatı Burcanadzenin "prezidenti nişan alması" ehtimalını yaradır.
"Gürcüstanın hakim partiyası Burcanadzenin simasında real güc və ciddi rəqib görür ", - deyə Trend - a Sintsadze bildirib.
Burcanadzenin siyasi nüfuzu və Qərbin dəstəyi prezident kürsüsü uğrunda mübarizədə əsas arqumentlər olacaq.
Müstəqil rusiyalı ekspert Vladimir Pribılovski bildirib ki, Burcanadzenin öz siyasi ambisiyaları var və prezidentliyə daha çox ehtimal oluna bilən namizəddir.
"Vaxtından əvvəl keçirilməsinə böyük ehtimal olan növbəti prezident seçkisində Saakaşvili ona məğlub ola bilər", - deyə Trend - a Moskvadan telefonla "Panorama" İnformasiya -Tədqiqat Mərkəzinin prezidenti Pribılovski bildirib.
Gürcüstan üzrə britaniyalı ekspert Skvortsova da Burcanadzeni prezident seçkisində Saakaşvili üçün daha real rəqib hesab edir. "O, Saakaşvilinin rəhbərlik etdiyi hakim partiyaya ən təhlükəli müxalifdir", - deyə Trend - a Londondan telefonla Risklərə Nəzarət Mərkəzinin eksperti Skvortsova bildirib.
Burcanadze ABŞ - ın fəal dəstəyindən istifadə edir. Onun Nyu - York və Vaşinqtona səfərləri və aparıcı siyasi partiyaların nümayəndələri ilə görüşlər keçirməsi bundan xəbər verir.
Sintsadze hesab edir ki, Burcanadzenin simasında real güc meydana gəlib və demokratik Qərbin və ABŞ - ın hər iki əsas partiyasının bu qüvvəni dəstəkləməsi, seçkilər keçiriləcəyi təqdirdə, yeni oyunçuya ölkənin ən ali postunu tutmaq üçün böyük şans verir.
Burcanadze Qərb ölkələrində olduqca mühüm görüşlər keçirdiyini bildirib və əlavə edib ki, bu görüşlər Qərbin ona böyük dəstək göstərdiyini deməyə əsas verir. "Bu o Qərbdir ki, Tbilisinin bombardmana məruz qalmaması üçün əlindən gələni etdi. Və Qərb, Gürcüstanın ərazi bütövlüyü və suverenliyinin qorunması üçün hər şey edir. Digər siyasi qüvvənin hakimiyyətə gələcəyi təqdirdə də, Gürcüstan Qərbin dəstəyini alacaq", - deyə Burcanadze əvvəllər Tbilisidə jurnalistlərlə görüşdə bildirib.
Qərbin dəstəyi səbəbindən, Burcanadzenin hakimiyyətə gəlməsindən sonra Gürcüstanın siyasi kursunun kəskin şəkildə dəyişəcəyi ehtimalı çox azdır.
"Onun siyasəti Saakaşvili siyasətindən kəskin fərqlənməyəcək; əvvəlki kimi qərbyönlü və Kreml əleyhinə olacaq, lakin daha ölçülüb - biçilmiş və sərt hərəkətlərsiz", - deyə Pribılovski bildirib.
Materilanı hazırlanmasında N.Kirtsxaliya (Tbilisi) və E.Ostapenko (Bakı) iştirak ediblər.
Məqalə müəllifi ilə əlaqə ünvanı - [email protected]
