Beynəlxalq Respublikaçılar İnstitutunun (BRİ) sentyabrın 9-da Bakıda Novxananın "Aqua Park" otelində "Gənclər siyasətdə: parlamentin fəaliyyəti" mövzusunda üçgünlük ümumrespublika gənclər konfransı işinə başlayıb.
Trend in məlumatına görə, konfransda Azərbaycanın bir çox bölgələrindən, o cümlədən Naxçıvan Muxtar Respublikasından siyasi partiyaları, qeyri-hökumət təşkilatlarını, tələbə-gənclər təşkilatlarını təmsil edən 100-ə qədər gənc iştirak edib.
ABŞ-ın ölkəmizdəki səfiri Rino Harniş, gənclər, idman və turizm nazirinin müavini İntiqam Babayev açılıq nitqi söyləyiblər. Konfransda millət vəkili Gültəkin Hacıyeva və digər qonaqlar da çıxış edərək gənclərin ölkə həyatında, ictimai-siyasi proseslərdə iştirakının, fəallığının artmasının vacibliyini qeyd ediblər.
BRİ-nin Azərbaycan üzrə rəhbəri Endrü Kolbörn deyib ki, bu konfrans ölkənin müxtəlif bölgələrindən olan fəal gənclərin görüşməsi və fikirlərini, ideyalarını mübadilə etməsi üçün əlverişlhi bir imkandır: "Ümidvaram ki, əsas diqqəti parlamentə yönəltməklə, iştirakçılar Azərbaycanda bu demokratik təsisatın əhəmiyyətini anlayacaqlar və noyabrın 6-da seçkilərə fəal şəkildə qatılacaqlar"-deyə Beynəlxalq Respublikaçılar İnstitutunun rəsmisi qeyd edib.
Üçgünlük seminar zamanı iştirakçılar gənclərin ictimai-siyasi fəallığının artırılmasına yönəldilmiş komanda qurma məşğələləri keçəcəklər. Konfransın ümumi mövzusu parlament və parlament seçkiləridir. Tədbirin tərkib hissəsi kimi iştirakçılar simvolik olaraq parlament yaradacaq və seçkilər keçirəcəklər.