Azərbaycan, Bakı, 15 mart /Trend/
ATƏT-ə sədrlik edən Litva postsovet məkanında "dondurulmuş" münaqişələr üçün həllin axtarışında fəal səylər göstərir, lakin nəticələr xeyli sonra görünəcək. Trend-in məlumatına görə, bu barədə çərşənbə axşamı "Ziniu radijas" radiostansiyasına müsahibəsində Litva Prezidentinin müşaviri Daryus Syamaşka bildirib.
O, ATƏT-in münaqişələr üzrə xüsusi elçisi Gedryus Çekuolisin bu məsələdə böyük uğur "heç olmasa bir millimetr irəliləyiş" ola bilər sözlərini də xatırladıb.
"Mən bizim bir millimetr irəliyə gedib-getməyəcəyimizi vaxtından əvvəl qiymətləndirmək istəməzdim, lakin fəal surətdə səylər göstərilir, xarici işlər naziri regiona səfər edir və regional siyasi liderlərlə, münaqişə tərəflərinin liderləri ilə müzakirələr aparır", - müşavir qeyd edib. Bu barədə "Baltic Daily" məlumat verib.
"Müzakirələr həqiqətən açıqdır və nazirimiz münaqişə tərəflərini öz aralarında dialoq aparmağa və bir-birinə etibarı artırmağa inandırmağa çalışır. Konkret nəticələrdən isə çox güman ki, gələn il geriyə dönərək və regiondakı vəziyyətin nə dərəcədə dəyişməsinə icmal verərək danışmaq olar", - Syamaşko vurğulayıb.
Bu həftə Litva XİN rəhbəri Audronyus Ajubalisin Azərbaycan, Gürcüstan və Ermənistana səfərlər edir. O, Qafqazada "dondurulmuş" münaqişələrin həlli imkanlarını müzakirə edir.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır.
1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır. BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.