Azərbaycan, Bakı, 30 dekabr / Trend , müxbir H.Bağırov/
Azərbaycanda prokuror terror barədə yalan məlumat verməkdə ittiham olunan məktəb direktoruna 6 il cəza istəyib.
Trend -un məlumatına görə, bu gün Ağır Cinayətlərə Dair İşlər üzrə Məhkəmədə Şəmkir rayonu Çənlibel kəndindəki orta məktəbin direktoru Hidayət Hüseynovun işi üzrə keçirilən prosesdə prokuror çıxış edib və Hüseynovun 6 il müddətinə azadlıqdan məhrum edilməsini məhkəmədən xahiş edib.
Yanvarın 6-da məhkəmə hökmü elan edəcək.
53 yaşlı Hidayət Hüseynov sərxoş vəziyyətdə bu il oktyabrın 17-də Şəmkir rayon Polis İdarəsinə, sonra isə Fövqəladə Hallar Nazirliyinin 112 xidmətinə zəng edərək, rəhbərlik etdiyi orta məktəbə bomba qoyulması barədə xəbər verib.
Məktəbdə hüquq-mühafizə orqanlarının əməkdaşları araşdırma aparsalar da, məlumat təsdiqini tapmayıb. Hüseynov rayon polis idarəsinin əməkdaşları tərəfindən saxlanılıb.
Hüseynov Cinayət Məcəlləsinin 216-cı (terrorla hədələmə) maddəsi ilə ittiham olunub.
Hüseynovun 33 illik pedaqoji təcrübəsi var, 1990-cı ildən isə məktəb direktoru vəzifəsində işləyir.