Azərbaycan, Bakı, 11 noyabr / Trend müxbir M.Əliyev/
"EkoSfera" Sosial-Ekoloji Mərkəzi "Qala" Tarixi-Etnoqrafik Muzey Kompleksi ilə birgə Abşeronun Qala kəndində Nar festivalı çərçivəsində "Abşeron: Terra qranatum" tədbirini keçirməyi planlaşdırır. Trend-in məlumatına görə, bu barədə cümə günü Mərkəzdən bildirilib.
Festivalda narın endemik növ olduğunun ictimaiyyətə çatdırılması, dekorativ-tətbiqi sənətkarlıq nümayişləri və master-klassların göstərilməsi, uşaqlar üçün interaktiv aksiyaların keçirilməsi nəzərdə tutulur.
Tədbirin noyabrın 12-də saat 12:00-dan 17.00-dək keçiriləcək.
Festivalın proqramına Qala ərazisində nar ağacı bağlarının salınması, dekorativ-tətbiqi sənətkarlıq nümayişləri (qurama, xalçaçılıq, keramika), nar şirələrinin dequstasiyası, "Nar pəhləvanları"nın yarışması, uşaq meydancasında "Face painting" (üz boyamaları), parça üzərində ressamlıq (kəlağayı və batika), keramika (dulusçuluq), araxçınların hazırlanması, "Abşeronun nar bağları" mövzusunda uşaqlar üçün rəsm müsabiqəsi, intellektual karaoke, nardan və şərq şirniyyatlarından hazırlanmış kompozisiyaların sərgisi, rəsm sərgisi, auksiyon və lotoreya, velosiped yarışı daxildir.
Festival Azərbaycan Mədəniyyət və Turizm Nazirliyinin dəstəyi ilə keçirilir.