Azərbaycan, Bakı, 29 dekabr / Trend müxbir M.Əliyev/
Azərbaycan Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) təşkil etdiyi fərdi jurnalist yazıları müsabiqəsinin qalibləri cümə axşamı mükafatlandırılıblar.
Trend-in məlumatına görə, mükafatlandırma mərasimində Fondun icraçı direktoru Vüqar Səfərli bildirib ki, müsabiqəyə təqdim olunan 76 yazınının içərisində qalibləri 9 ekspert qiymətləndirib.
Onun sözlərinə görə, fəaliyyət göstərdiyi 3 ildə Fondun təşkilatçılığı və yaxud dövlət qurumları ilə birgə keçirdiyi müsabiqələrdə 350 jurnalist qalib elan olunub.
"Müsabiqələri keçirməkdə əsas məqsəd jurnalistlərin peşəkarlığının artırılması və onların sosial vəziyyətinin yaxşılaşdırılmasıdır", - o bildirib.
Tədbirdə çıxış edən Azərbaycan Prezident Administrasiyasının İctimai-siyasi məsələlər şöbəsinin müdiri Əli Həsənov bildirib ki, fəaliyyət göstərdiyi 3 il ərzində KİVDF Azərbaycan mediasının maddi-mənəvi bazasının yüksəldilməsi, jurnalistlərin peşəkarlığının artırılması, söz və mətbuat azadlığının təmin olunması sahəsində çox işlər görüb.
"Bu işlər davam etdiriləcək. Bu Azərbaycan dövlətinin siyasətidir", - o deyib.
Həsənov bildirib ki, bu gün Azərbaycan dövləti söxün həqiqi mənasında KİV-lərə, onların nümayəndələrinə qayğını, onların maddi-texniki prolemlərinin həllini öz vəzifəsi və borcu hesab edir.
"Biz jurnalistlərsiz, azad sözsüz, azad mətbuatsız Azərbaycan cəmiyyətinin nə keçmişini, nə bu gününü, nə gələcəyini təsəvvür edə bilmərik", - o deyib.