Bakı. Trend:
Türkiyənin İğdır şəhərində müasir Azərbaycan dövlətinin qurucusu, görkəmli dövlət xadimi, Ümummilli Lider Heydər Əliyevin anım gününə həsr olunmuş tədbir keçirilib.
Diasporla İş üzrə Dövlət Komitəsindən Trend-ə verilən məlumata görə, İğdır Azərbaycan Evində təşkil olunan tədbir Ulu Öndərin və şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
İğdır Azərbaycan Evinin rəhbəri Ziya Zakir Acar açılış nitqində Ümummilli Lider Heydər Əliyevin Azərbaycan xalqı qarşısındakı misilsiz xidmətlərindən danışıb. Onun azadlıq və istiqlaliyyət tarixindəki xilaskar rolundan bəhs edərək, ölkəmizin ən ağır günlərində və taleyüklü məqamlarında qalib çıxdığını vurğulayıb. Heydər Əliyevin müasir dünya tarixinə parlaq və silinməz iz qoymuş böyük şəxsiyyət, qeyri-adi zəka sahibi və müdrik dövlət xadimi kimi düşdüyünü qeyd edib.
Türkiyənin Sosial Müdafiə Qurumunun İğdır təşkilatının rəhbəri Reşat Eyikudamacı, İğdır Azərbaycan Evi Dərnəyinin sədri Serdar Ünsal, İğdırdakı Heydər Əliyev adına liseyin müdiri Yavuz Bağcı Türkiyə-Azərbaycan münasibətlərinin hazırkı yüksək səviyyəyə çatmasının təməllərini məhz Ulu Öndər Heydər Əliyevin atdığını və bu əlaqələri Azərbaycan Respublikasının Prezidenti İlham Əliyevin uğurla davam etdirdiyini söyləyiblər.
