Bakı. Maksim Tsurkov - Trend:
Rusiyalı idmançı Marqarita Mamun Bakıda keçirilən bədii gimnastika üzrə Dünya Kubokunun finalında topla hərəkətlərin yekunu üzrə qızıl medal qazanıb.
Trend-in məlumatına görə, onun nəticəsi 19.400 bal olub.
Gümüş medala digər rusiyalı Aleksandra Soldatova (19.000), bürünc medala isə israilli gimnast Neta Rivkin (18.500) sahib çıxıb.
Azərbaycan təmsilçisi Marina Durunda isə 17.900 bal toplayaraq 7-ci yeri tutub.
Qeyd edək ki, bu il bədii gimnastika üzrə FIG Dünya Kubokunun finalı 22-24 iyul tarixlərində Azərbaycanın paytaxtında keçirilir. Yarışların ilk iki günündə çoxnövçülükdə 17 ölkənin gimnastı medallar uğrunda mübarizə aparıb. Dünya Kubokunun son günündə ayrı-ayrı növlər üzrə finallar keçirilir.