Azərbaycan, Bakı, 20 fevral / Trend , müxbir N.İsmayılova/ "Dünya Bankı qrupunun üzvü olan IFC lizinq şirkətlərinə və mikromaliyyə təşkilatlarına mikro lizinq xidmətlərinin göstərilməsində köməklik etmək üçün mikro lizinq alətlərini tətbiq edir", - korporasiyanın məlumatında deyilir.
Bu iş mikromaliyyə xidmətlərinin genişlənməsinə əlavə imkanlar yaratmaqla və bununla da kiçik sahibkarların ilkin kapitalı və ya nisbətən az xərclərlə biznesi genişləndirmək imkanlarını artırmaqla, kiçik sahibkarlığın inkişafına və inkişaf edən ölkələrdə iqtisadi böhranın aradan qaldırılması tədbirlərinə dəstək olmaq məqsədinə xidmət edir.
Bu təşşəbüsü həyata keçirmək üçün, IFC Azərbaycanın və Mərkəzi Asiyanın mikromaliyyə təşkilatları üçün "Mikromaliyyə əməliyyatlarının əsasları və xüsusiyyətləri" adlı iki günlük təlim kursları keçirib. IFC bu təlimi fevralın 19-20-də Azərbaycan Mikromaliyyə Assosiasiyası ilə birgə keçirib.
"Mikro lizinq kimi, yeni innovasiya məhsulunun təqdim edilməsi maliyyə institutlarının mövcud portfelini diversifikasiya etdiyi, və bundan əlavə, hazırkı iqtisadi böhran şəraitində kiçik sahibkarlara mühüm dərəcədə kömək etdiyi üçün əhəmiyyətlidir," - Azərbaycan Mikromaliyyə Assosiasiyasının icraçı direktoru Jalə Hacıyeva qeyd edib.
"İnkişaf edən ölkələrdə mikro lizinq, lizinq sektorunun mühüm hissəsini təşkil edir," - IFC-nin Azərbaycanda və Orta Asiyada Lizinq Xidmətləri Layihəsinin meneceri Anastasiya Marina qeyd edib. "Biz ümidvarıq ki, bizim işimiz qeyd olunan ölkələrdə mikromaliyyə təşkilatlarına mikro lizinq əməliyyatlarını həyata keçirməyə kömək edəcək və bununla da mikro və kiçik biznesin inkişafına mühüm dəstək göstərəcək".
IFC-nin səyləri nəticəsində Azərbaycan, Qırğızıstan, Tacikistan və Özbəkistanda 90-dan artıq mütəxəssis təlim alıb. Bu təşəbbüs, IFC-nin Azərbaycanda və Orta Asiyada Lizinq Xidmətləri Layihəsinin bir hissəsi olaraq İsveçrənin İqtisadi Məsələlər üzrə Dövlət Komitəsi tərəfindən maliyyələşdirilir.
Məqalə müəllifi ilə əlaqə ünvanı: [email protected]
