Gürcüstan, Tbilisi, 7 aprel /Trend, müxbir N.Kirsxaliya/
2011-ci ilin ilk üç ayı ərzində Azərbaycandan 139 706 müsafir Gürcüstana səfər edib. Azərbaycan vətəndaşları səfər edənlərin sayına görə yalnız Türkiyə müsafirlərindən geridə qalır. Bu barədə Trend-ə Gürcüstan Milli Turizm Agentliyindən məlumat verilib.
Beynəlxalq müsafirlərin sayına görə birinci yerdə 149 145 nəfərlə Türkiyədir. Ölkənin turizm bazarında Türkiyə müsafirlərinin sayı 47 faiz artıb. Bu, bir tərəfdən bu ölkədən işgüzar səfərə gələnlər, digər tərəfdən Türkiyədən Acarıstan regionuna, xüsusilə də qumar oyunlarına marağı olanların Batumiyə getməsi ilə əlaqədardır.
Azərbaycan müsafirlərinin müəyyən hissəsi Gürcüstanın dağ-xizək kurortlarında, xüsusilə Bakurianidə istirahət edib.
2011-ci ilin birinci rübündə Gürcüstana 486 506 nəfər səfər edib. Bu, ötən ilin anoloji dövr göstəricisindən 41 faiz çoxdur.
Agentlikdən qeyd ediblər ki, 2011-ci ilin birinci rübü ərzində Rusiyadan olan müsafirlərin sayı 35 faiz artıb. Moskva və Şimali Qafqazdan, xüsusilə də Vladiqafqazdan olan müsafirlər qış fəslini Qudauridəki dağ-xizək kurortunda keçiriblər.