Azərbaycan, Bakı, 12 yanvar /Trend, müxbir İ.Xəlilova/
Azərbaycanda həyat sığortası ilə məşğul olan "Paşa Həyat", "Atəşgah Həyat" və "Qala Həyat" şirkətləri 2012-ci ilin yanvar-dekabr aylarında həyat sığortasının bütün növləri üzrə 36,81 milyon manat toplayıblar ki, bu da ötən ilin analoji dövr göstəricisini 1,64 dəfə üstələyir. Trend-in məlumatına görə, bu barədə Maliyyə Nazirliyi yanında Dövlət Sığorta Nəzarəti Xidmətinin 2012-ci ilin yanvar-dekabr aylarında sığorta şirkətlərinin fəaliyyəti haqqında hesabatında deyilir.
Bununla yanaşı, şirkətlərin yığımlarının ümumi həcmində həyat sığortası üzrə mükafatların payı il ərzində cüzi artıb - 10,55 faizdən 10,75 faizədək.
Bu növlər üzrə ödənişlər də artıb: 2012-ci ildə 4,224 milyon manat dəyərində dəymiş ziyan ödənilib ki, bu da ötən ilin göstəricisindən 10,73 dəfə çoxdur.
2012-ci ildə şirkətlər istehsalatda peşə xəstəlikləri və bədbəxt hadisələr nəticəsində peşə əmək qabiliyyətinin itirilməsi hallarından icbari sığorta üzrə 21,72 milyon manat toplayıblar. Bu, ötən ilin analoji dövr göstəricisindən 14,9 faiz çoxdur.
Könüllü həyat sığortası üzrə yığımlar il ərzində 4,13 dəfə artaraq 15,085 milyon manata çatıb. Həyat sığortası sahəsində yığımların böyük hissəsi (11,92 milyon manat) ömrün qalan hissəsinin sığortasının payına düşüb. Qalan hissə ölum halının sığortalanması (3,078 milyon manat) və sağalmaz xəstəliklərdən sığortalanma (87,395 min manat) hesabına təmin edilib.
Ötən il könüllü həyat sığortası üzrə 3,045 milyon manat, icbari həyat sığortası üzrə 1,179 milyon manat məbləğində ödənişlər həyata keçirilib.
2012-ci ilin yekunları üzrə ölkədə fəaliyyət göstərən bütün şirkətlərin mükafatlarının ümumi həcmi 342,52 milyon manat təşkil edib (il ərzində 60,8 faiz artım), hesabat dövründə ödənişlər isə 93,86 milyon manat (artım 52,45 faiz) olub.
Qeyd edək ki, Azərbaycan Maliyyə Nazirliyinin hesabatında AzRE yeganə təkrarsığorta şirkətinin fəaliyyətinin yekunları göstərilməyib.