Azərbaycan, Bakı, 8 aprel /Trend/
2013-cü ilin birinci rübündə Vergilər Nazirliyinin 195 Çağrı Mərkəzi tərəfindən 84 868 müraciət cavablandırılıb, vergi ödəyicilərinə 129 469 sayda mesaj göndərilməklə onların məlumatlandırılması təmin edilib.
Nazirliyin Analitik-informasiya şöbəsindən Trend-ə verilən məlumata görə, Telefon Məlumat Xidmətinə daxil olmuş müraciətlərin 49 913-ü canlı rejimdə müfəttiş-operatorlar, 34 955-i isə avtomatik rejimdə elektron operator tərəfindən cavablandırılıb. Müfəttiş-operatorlar tərəfindən cavablandırılmış suallar arasında vergi növləri (15,4%), elektron xidmətlər (18,6%), qeydiyyat (9,7%), hesabatlar və onların doldurulma qaydaları (17,1%), büdcə, vergi ödəyiciləri və vergi orqanlarının rekvizitləri (6,4%) barədə suallar, avtomatik rejimdə qəbul edilmiş müraciətlər arasında isə vergi növləri (67,5%) və dövlət büdcəsinə olan vergi borcları (24,4%) barədə müraciətlər üstünlük təşkil edib.
Hesabat dövrü ərzində canlı əlaqə zamanı müfəttiş-operatorlar tərəfindən cavablandırılmış müraciətlərin sayı 2012-ci ilin müvafiq dövrünə nisbətən 22,5% artıb. Birinci rüb ərzində vətəndaşlardan şikayət (ərizə) və məlumat xarakterli 342 müraciət qəbul edilərək aidiyyəti üzrə göndərilib.
Canlı rejimdə vergi ödəyicilərindən daxil olan sual xarakterli müraciətlərin 98,5%-i müfəttiş-operatorlar tərəfindən dərhal, 1,5%-i isə sual vərəqəsi tərtib edilərək araşdırıldıqdan sonra cavablandırılıb. Müraciətlərin 75,2%-i Bakı şəhərindən, 10,2%-i mobil operatorlardan, qalanı isə ölkənin müxtəlif bölgələrindən daxil olub.